ചോദ്യം: മയ്യിത്തിന്റെ മേൽ ഒരു പ്രാവശ്യം നിസ്കാരം നടന്നാൽ ശേഷമുള്ള നിസ്കാരങ്ങൾ ഖബറടക്കത്തിനു ശേഷം നിർവഹിക്കണമെന്നല്ലേ? പക്ഷേ നമ്മുടെ നാടുകളിൽ ഉസ്താദുമാർ മരിച്ചാൽ ഒട്ടേറെ പ്രാവശ്യം മയ്യിത്ത് നിസ്കാരം നടത്തിയതിന് ശേഷമാണല്ലോ ഖബറടക്കം ചെയ്യാറുള്ളത്. ഇതിൻ്റെ ന്യായമെന്താണ്? വിശദമായ മറുപടി പ്രതീക്ഷിക്കുന്നു.
ഒരു മുതഅല്ലിം
ഉത്തരം: മയ്യിത്തിൻ്റെ മേൽ നിസ്കാരം നിർവഹിക്കപ്പെട്ടതിനു ശേഷം ഹാജറായവർ ആ മയ്യിത്തിൻ്റെ മേൽ നിസ്കാരം നിർവഹിക്കൽ സുന്നത്താണ്. ആ നിസ്കാരം ഖബറടക്കത്തിനു ശേഷം നിർവഹിക്കലാണ് ഏറ്റവും ഉത്തമം. (ഫത്ഹുൽ മുഈൻ 159)
ഇമാം ഖത്വീബുശ്ശിർബീനി (റ) എഴുതുന്നു: മയ്യിത്ത് നിസ്കാരത്തിന്റെ ഫർളു കിഫായ വീടുന്നവർ നിസ്കരിച്ചു കഴിഞ്ഞാൽ മറ്റൊരു നിസ്കാരത്തിന് വേണ്ടി കാത്തിരിക്കേണ്ടതില്ല. അവർ ഖബറിനു സമീപം നിസ്കരിക്കുകയാണ് വേണ്ടത് (മുഗ്നി 2-51)
അല്ലാമ അലിയ്യുശ്ശബ്റാമല്ലിസി (റ) എഴുതുന്നു; ഖബറടക്കത്തിനു ശേഷം ഖബറിന് സമീപം വെച്ച് മയ്യിത്ത് നിസ്കാരം നടത്തുന്ന പതിവ് ഇന്നില്ല. അതിനാൽ ഖബറിനു സമീപം അവർ നിസ്കരിക്കുകയില്ലെന്നാണ് മികച്ച ധാരണയെങ്കിൽ മയ്യിത്തിനുള്ള മസ്ലഹത്ത് പരിഗണിച്ച് ഖബറടക്കത്തിന് മുമ്പ് തന്നെ അവർ നിസ്കരിക്കാനായി കാത്തിരിക്കൽ സുന്നത്താണെന്ന് പറയൽ വിദൂരമല്ല.(ഹാശിയതുന്നിഹായ: 3-28)
മയ്യിത്തിൻ്റെ മേൽ ഒരു നിസ്കാരം കഴിഞ്ഞതിന് ശേഷമുള്ള നിസ്കാരങ്ങൾ ഖബറടക്കത്തിനു ശേഷത്തേക്ക് പിന്തിക്കലാണ് ഏറ്റവും ഉത്തമം എന്നുണ്ടെങ്കിലും ജനങ്ങൾ ഖബറിനു സമീപം നിസ്കരിക്കുന്നതിൽ വേണ്ടത്ര താൽപര്യം കാണിക്കാത്തതിനാലും ഖബറിന് സമീപം കൂടുതലാളുകൾ നിസ്കരിക്കുന്നതിന് സൗകര്യക്കുറവുള്ളതിനാലുമായിരിക്കണം പല പ്രാവശ്യം നിസ്കാരം നടത്തിയതിനു ശേഷം ഖബറടക്കുന്നത് എന്ന് മനസ്സിലാക്കാവുന്നതാണ്.
ഫതാവാ നമ്പർ : 682
ഉസ്താദ് അബ്ദുൽ ജലീൽ സഖാഫി ചെറുശ്ശോല
https://chat.whatsapp.com/GqC6EHp9tCs6kP3kvZGedn
No comments:
Post a Comment