ഉസ്താദുമാരെ പേരു വിളിക്കൽ

*ഉസ്താദുമാരെ പേരു വിളിക്കൽ*

*❓പ്രശ്നം:*ഉസ്താദുമാരെ പേരുവിളിക്കുന്നതിന്റെ വിധിയെന്ത് ? ഉസ്താദ് എന്നു ചേർത്തു കൊണ്ട് അവരുടെ പേർ വിളിക്കുന്നതിൽ അപാകതയുണ്ടോ ?ഉദാഹരണമായി മുഹമ്മദുസ്താദ്, ഖാദിറുസ്താദ് എന്നിങ്ങനെ. കത്തുകളിൽ എഴുതുമ്പോൾ ഇങ്ങനെ എഴുതുന്നതിൽ തെറ്റുണ്ടോ ?

*✅ഉത്തരം:* ഗുരുവര്യന്മാരെ പേരുകൊണ്ടു വിളിക്കാതിരിക്കൽ സുന്നത്താണ്. നിഹായ: 8-140. ഇത് ഉസ്താദ് പോലുള്ള ബഹുമാന സൂചകമായ വല്ലതും കൂട്ടിച്ചേർത്തു കൊണ്ടായാലും വിളിക്കരുത്.റശീദി 8-140. കത്തുകളിൽ എഴുതുമ്പോളും പേര് ഒഴിവാക്കേണ്ടതാണ്.ശബ്റാമല്ലിസി. 8-140.

*✍🏻മൗലാനാ എ.നജീബ് മൗലവിയുടെ💥 പ്രശ്നോത്തരം📓 ഭാഗം:രണ്ട് ,പേജ്: 91*


*📩അഹിബ്ബാഉ മൗലാനാ വാട്സപ്പ് ഗ്രൂപ്പ്💌*

ബൈബിൾഈ നബിമാര്‍ ഖുര്‍ആനിലുണ്ടോ

ഈ നബിമാര്‍ ഖുര്‍ആനിലുണ്ടോ?● 0 COMMENTS
🍔🍿🍔🍿🍔🍿
അഹ്ലുസ്സുന്നയുടെ ആദർശ പഠനത്തിന്  ഇസ്ലാമിക് ഗ്ലോബൽ വോയ്സ് ബ്ലോഗ്    ഉപയോഗപ്പെടുത്തുക

https://islamicglobalvoice.blogspot.in/?m=0
മൂസാ നബി(അ)യുടെ ചരിത്രം വിശദീകരിക്കുന്നതിലും ഖുര്‍ആനും ബൈബിളും ഇരുചേരിയില്‍ നില്‍ക്കുന്നതായി കാണാം. ബൈബിള്‍ പരാമര്‍ശിക്കാത്ത പല സംഭവങ്ങളും ഖുര്‍ആനിലുള്ളത് ബൈബിളില്‍ നിന്നും പകര്‍ത്തിയെഴുതിയതല്ല ഖുര്‍ആന്‍ എന്ന് ഒരിക്കല്‍കൂടി വ്യക്തമാക്കുന്നു. ചെറുപ്പത്തില്‍ മൂസാ നബി(അ)നെ ദത്തെടുത്തത് ഫറോവാന്‍റെ പുത്രിയാണെന്നാണ് ബൈബിള്‍ പറയുന്നത്: “കുഞ്ഞ് വളര്‍ന്നപ്പോള്‍ അവള്‍ അവനെ ഫറവോന്‍റെ പുത്രിയുടെ അടുക്കല്‍ കൊണ്ടുവന്നു; അവന്‍ അവള്‍ക്ക് മകനായിത്തീര്‍ന്നു. “ഞാന്‍ ഇവനെ വെള്ളത്തില്‍ നിന്ന് വലിച്ചെടുത്തു’ എന്നു പറഞ്ഞ് അവന് മോശെ എന്നു പേരുവിളിച്ചു’ (പുറപ്പാട് 2/10). എന്നാല്‍ ഖുര്‍ആന്‍ പറയുന്നത് ഫിര്‍ഔനിന്‍റെ ഭാര്യയാണ് മൂസാനബി(അ)നെ ദത്തെടുത്തത് എന്നാണ്. “ഫിര്‍ഔന്‍റെ ഭാര്യ പറഞ്ഞു: “(ഈ കുട്ടി) എനിക്കും നിങ്ങള്‍ക്കും കണ്ണിന്‍റെ കുളിര്‍മയത്രെ. ആയതുകൊണ്ട് ഇവനെ നിങ്ങള്‍ കൊല്ലരുത്. ഇവന്‍ നമുക്ക് ഉപകരിച്ചേക്കും. അല്ലെങ്കില്‍ മകനായി സ്വീകരിക്കുകയുമാവാം’ (സൂറതുല്‍ ഖസസ്/9). മക്കളെ സഹായിച്ചതില്‍ സംപ്രീതനായി ശുഐബ്(അ) തന്‍റെ പെണ്‍കുട്ടികളിലൊരാളെ മൂസ(അ)ന് വിവാഹം ചെയ്തുകൊടുക്കാന്‍ തീരുമാനിച്ചുവെന്നും ശേഷം മൂസ(അ) എട്ടുവര്‍ഷം ശുഐബ്(അ)ന് സേവനം ചെയ്തുകൊടുത്തുവെന്നും ഖുര്‍ആനില്‍ പറയുന്നു (ഖസ്വസ് 2729). എന്നാല്‍ ബൈബിളില്‍ ഇങ്ങനെ ഒരു സംഭവം കാണുന്നില്ല. ഖുര്‍ആന്‍ വിവരണമനുസരിച്ച് ശുഐബ് നബി(അ)ന് രണ്ടു പുത്രിമാരാണുണ്ടായിരുന്നത്. എന്നാല്‍ ബൈബിള്‍ വിവരണമനുസരിച്ച് ഏഴു പുത്രിമാരാണുള്ളത്. ഈ സംഭവം ബൈബിളെഴുത്തുകാര്‍ യാക്കോബിനാണ് നല്‍കുന്നത്. അതും പ്രേമം തോന്നിയ പെണ്ണിനെ സ്വന്തമാക്കാന്‍ വേണ്ടി. ഇതു കാണുക: യാക്കോബ് റാഹേലിനെ സ്നേഹിച്ചു. നിന്‍റെ മകളായ റാഹേലിനുവേണ്ടി ഞാന്‍ ഏഴു വര്‍ഷം നിന്നെ സേവിക്കാം എന്നു പറഞ്ഞു. അതിന് ലാന്പാന്‍ “ഞാന്‍ അവളെ മറ്റൊരു പുരുഷനു കൊടുക്കുന്നതിനേക്കാള്‍ നിനക്കു തരുന്നതിനാണ് നല്ലത്. എന്നോടു കൂടെ പാര്‍ക്കുക എന്നു പറഞ്ഞു. അങ്ങനെ യാക്കോബ് റാഹേലിനുവേണ്ടി ഏഴു വര്‍ഷം സേവനം ചെയ്തു. അവളോടുള്ള സ്നേഹം നിമിത്തം അവന് അത് അല്‍പ ദിവസങ്ങള്‍ പോലെ തോന്നി (ഉല്‍പത്തി 28/1820). മൂസാ(അ), ഖിള്ര്‍(അ) എന്നിവരൊന്നിച്ചുള്ള ഒരു പഠനയാത്രയും അതിലുണ്ടായ സ്തോജനകങ്ങളായ നിരവധി സംഭവങ്ങളും വിശുദ്ധ ഖുര്‍ആന്‍ വിശദമായി പരാമര്‍ശിക്കുന്നതു കാണാം (അല്‍കഹ്ഫ് 6082). ഇതേക്കുറിച്ചും ബൈബിളിനു മൗനമാണുള്ളത്. ബൈബിളില്‍ നിന്നു ഖുര്‍ആന്‍ പകര്‍ത്തിയതാണെങ്കില്‍ തീര്‍ച്ചയായും ഈ സംഭവം ഖുര്‍ആനിലും കാണാതാവുമായിരുന്നു. യേശു ക്രൈസ്തവര്‍ ദൈവമെന്നും ദൈവാംശമെന്നുമൊക്കെ പരിചയപ്പെടുത്തുന്ന യേശുക്രിസ്തു അല്ലാഹുവിന്‍റെ പ്രവാചകന്മാരില്‍ ഉള്‍പ്പെടുന്ന ഈസാ(അ) ആണ്. അദ്ദേഹവുമായി ഏറെ ബന്ധം പുലര്‍ത്തുന്നവരെന്ന് ക്രൈസ്തവര്‍ സ്വയമവകാശപ്പെടുമെങ്കിലും അവരുടെ ബൈബിള്‍ തന്നെയാണ് മഹാനുഭാവനെ ഏറെ അവമതിക്കുന്നതെന്നത് വിചിത്രമായി തോന്നാം. എന്നാല്‍ അതൊരു വസ്തുത മാത്രമാണ്. മാതാവിനോടു കയര്‍ത്തു സംസാരിക്കുക (യോഹ 2/14), വീഞ്ഞുണ്ടാക്കി ജനങ്ങളെ ഉന്മത്തരാക്കുക (യോഹ 2/610), അപകീര്‍ത്തികരമായി സംസാരിക്കുക (മത്തായി 12/34,38) തുടങ്ങി നിരവധി കുഴപ്പങ്ങള്‍ യേശുവിനു മേല്‍ ബൈബിള്‍ ആരോപിക്കുന്നതു കാണാം. പുറമെ യേശുവിന്‍റെ വംശാവലിയെന്ന പേരില്‍ അദ്ദേഹവുമായി ഒരു ബന്ധവുമില്ലാത്ത തന്‍റെ മാതാവിന്‍റെ ഭര്‍ത്താവായ ജോസഫിന്‍റെ വംശപരമ്പര രണ്ടിടങ്ങളില്‍ നല്‍കുകയും (മത്തായി 1/116, ലൂക്കോസ് 3/2338) ചെയ്തിരിക്കുന്നു. ഇതില്‍ ഒരിക്കലും ദൈവസഭയില്‍ ഉണ്ടാവാന്‍ പാടില്ലെന്ന് പഴയ ബൈബിള്‍ ആവര്‍ത്തന പുസ്തകം പഠിപ്പിച്ച വ്യഭിചാര സന്തതികള്‍ വരെ ഉള്‍പ്പെടുകയും ചെയ്തിരിക്കുന്നു! മാത്രമല്ല, മഹാനായ ഈസാ നബി(അ) സമൂഹത്തില്‍ ഭിന്നതയും ഛിദ്രതയും ഉണ്ടാക്കാനാണ് വന്നതെന്നുപോലും ബൈബിള്‍ പറയുന്നുണ്ട്! ഭൂമിയില്‍ സമാധാനം നല്‍കുവാന്‍ ഞാന്‍ വന്നിരിക്കുന്നുവെന്ന് തോന്നുന്നുവോ? അല്ല, ഭിന്നത വരുത്തുവാനത്രെ എന്നു ഞാന്‍ നിങ്ങളോട് പറയുന്നു. ഇനി മേല്‍ ഒരു വീട്ടില്‍ ഇരുവരോട് മൂവരും മൂവരോട് ഇരുവരും ഇങ്ങനെ അഞ്ചുപേര്‍ തമ്മില്‍ ഭിന്നിച്ചിരിക്കും. അപ്പന്‍ മകനോടും മകന്‍ അപ്പനോടും അമ്മ മകളോടും മകള്‍ അമ്മയോടും അമ്മാവിയമ്മ മരുമകളോടും മരുമകള്‍ അമ്മാവിയോടും ഭിന്നിച്ചിരിക്കും (ലൂക്കോസ് 12/5153). ഞാന്‍ ഭൂമിയില്‍ സമാധാനം വരുത്തുവാന്‍ വന്നുവെന്ന് നിരൂപിക്കരുത്; സമാധാനമല്ല, വാള്‍ വരുത്തുവാനത്രെ ഞാന്‍ വന്നത് (മത്തായി 10/34). യേശുവിനെ ശത്രുക്കളായ ജൂതന്മാര്‍ കുരിശില്‍ തറച്ചുകൊന്നുവെന്നാണ് ബൈബിള്‍ പാഠം. അതാണ് ആധുനിക ക്രൈസ്തവതയുടെ അടിസ്ഥാനം തന്നെ. എന്നാല്‍ വിശുദ്ധ ഖുര്‍ആന്‍ ഈ ദുരാരോപണം ശക്തമായി നിഷേധിക്കുകയും ഈസ(അ)നെ അല്ലാഹു ആകാശത്തിലേക്കുയര്‍ത്തി രക്ഷപ്പെടുത്തിയെന്ന വസ്തുത വെളിപ്പെടുത്തുകയും ചെയ്തിരിക്കുന്നു. ഇവിടെയും പകര്‍പ്പെഴുത്ത് വാദം തകര്‍ന്നടിയുകയാണ്.  ബൈബിള്‍ഖുര്‍ആന്‍/7 ജുനൈദ് ഖലീല്‍ സഖാഫി

ബാപ്പു മുസ്‌ലിയാര്‍ നിയോഗം പോലെ ഈ ജന്മം● 0

തിരൂരങ്ങാടി ബാപ്പു മുസ്‌ലിയാര്‍ നിയോഗം പോലെ ഈ ജന്മം● 0 COMMENTS
🍔🍿🍔🍿🍔🍿
അഹ്ലുസ്സുന്നയുടെ ആദർശ പഠനത്തിന്  ഇസ്ലാമിക് ഗ്ലോബൽ വോയ്സ് ബ്ലോഗ്    ഉപയോഗപ്പെടുത്തുക

https://islamicglobalvoice.blogspot.in/?m=0
ആന്തരികവും ബാഹ്യവുമായ വിജ്ഞാനങ്ങളുടെ മഹത്തായ ഒരു ഉറവിടത്തിലേക്കാണ് തിരൂരങ്ങാടി ബാപ്പു മുസ്‌ലിയാരുടെ മാതാപിതാക്കളുടെ പരമ്പര ചെന്നെത്തുന്നത്. നഖ്ശബന്ദി ത്വരീഖത്തിന്റെ ശൈഖും കര്‍മശാസ്ത്ര പണ്ഡിതനുമായ അശ്ശൈഖ് അബ്ദുറഹ്മാന്‍ അന്നഖ്ശബന്ദി(റ)യുടെ സന്താന പരമ്പരയിലാണ് അദ്ദേഹം ജനിച്ചത്.

നിറമരുതൂര്‍ ബീരാന്‍കുട്ടി മുസ്‌ലിയാര്‍, അബുല്‍ കമാല്‍ കാടേരി മുഹമ്മദ് മുസ്‌ലിയാര്‍, കരിങ്കപ്പാറ മുഹമ്മദ് മുസ്‌ലിയാര്‍, കോട്ടുമല അബൂബക്കര്‍ മുസ്‌ലിയാര്‍, ഉസ്താദുല്‍ അസാതീദ് ഒകെ സൈനുദ്ദീന്‍കുട്ടി മുസ്‌ലിയാര്‍ തുടങ്ങിയ മഹാ പണ്ഡിതരാണ് ബാപ്പു ഉസ്താദിന്റെ ഗുരുവര്യര്‍. ഉസ്താദുമാരുടെയെല്ലാം പൂര്‍ണ സംതൃപ്തിയും പ്രശംസയും ബാപ്പുമുസ്‌ലിയാര്‍ സ്വായത്തമാക്കിയിട്ടുണ്ട്. ഒകെ ഉസ്താദ് പലപ്പോഴും ബാപ്പു മുസ്‌ലിയാരെ പ്രശംസിച്ച് പറയുന്നത് കേട്ടിട്ടുണ്ട്. ഇങ്ങനെ മാതൃപിതൃ പരമ്പരയും ഗുരുശൃംഖലയും അത്യുന്നതമായതിന്റെ ഫലം അദ്ദേഹത്തില്‍ തെളിഞ്ഞുകണ്ടിരുന്നു.

ആദര്‍ശദാര്‍ഢ്യതയും ബിദ്അത്തുകാരോടുള്ള വെറുപ്പും ബാപ്പു മുസ്‌ലിയാരില്‍ എപ്പോഴും മികച്ചുനിന്നു. ഒരവസരത്തില്‍ അദ്ദേഹം തന്നെ അതിന്റെ കാരണം ഇങ്ങനെ വിശദീകരിച്ചതോര്‍ക്കുന്നു:

“പുത്തന്‍ ആശയക്കാര്‍ കേരളത്തില്‍ എത്തുന്നത് നൂറു കൊല്ലത്തിനിപ്പുറമാണ്. പക്ഷേ, അന്നത്തെ അവരുടെ നേതാക്കള്‍ ആലിമീങ്ങളുടെ വേഷത്തില്‍ പ്രത്യക്ഷപ്പെട്ടിരുന്നവരായതു കൊണ്ട് സാധാരണക്കാര്‍ക്ക് അവരെ വേര്‍തിരിച്ച് മനസ്സിലാക്കാന്‍ കഴിഞ്ഞിരുന്നില്ല. അതുകൊണ്ടുതന്നെ ചില പ്രദേശങ്ങളെല്ലാം അവരുടെ പിടിയിലമര്‍ന്നു. എടവണ്ണയില്‍ അലവി മൗലവിയും പുളിക്കല്‍ അബുസ്വബാഹ് മൗലവിയും ഉദാഹരണം. അന്ന് അവരെ പ്രതിരോധിക്കാനും അവരുടെ ഉള്ളിലിരുപ്പ് മുസ്‌ലിം ബഹുജനങ്ങള്‍ക്ക് വ്യക്തമാക്കിക്കൊടുക്കാനും ആളില്ലാതെ പോവുകയും ചെയ്തു.

എന്നാല്‍ തിരൂരങ്ങാടി അങ്ങനെയായിരുന്നില്ല. കെഎം മൗലവി, എംസിസി അബ്ദുറഹ്മാന്‍ മൗലവി അടക്കമുള്ള വഹാബികളുടെ വലിയ നേതാക്കന്മാര്‍ അവിടെയുണ്ടായിരുന്നെങ്കിലും തിരൂരങ്ങാടിയില്‍ സുന്നത്ത് ജമാഅത്തിന്റെ വലിയ ആലിമീങ്ങളുടെ നിറസാന്നിധ്യവുമുണ്ടായിരുന്നു. അവരില്‍ നിന്ന് യഥാര്‍ത്ഥ ഇസ്ലാമിന്റെ വിശ്വാസങ്ങളും കര്‍മങ്ങളും സ്വഭാവ സംസ്കാരങ്ങളും പഠിച്ചവരായിരുന്നു അവിടുത്തെ മുസ്‌ലിം ബഹുജനങ്ങള്‍. ശാഫിഈ മദ്ഹബിലെ വിശ്രുത ഗ്രന്ഥമായ ഇബ്നുഹജറി(റ)ന്റെ തുഹ്ഫതുല്‍ മുഹ്താജിന് വ്യാഖ്യാനമെഴുതിയ ശൈഖ് അബ്ദുല്‍ ഹമീദ് ശര്‍വാനി(റ)യുടെ ശിഷ്യനും ഫത്ഹുല്‍ മുഈനിന്റെ വ്യാഖ്യാന ഗ്രന്ഥമായ ഇആനത് ത്വാലിബീന്‍ രചയിതാവായ ശൈഖ് മുഹമ്മദുല്‍ ബക്രി(റ)യുടെ ഗുരുവര്യരുമായ കോടഞ്ചേരി അഹ്മദ് കുട്ടി മുസ്‌ലിയാര്‍(റ) തിരൂരങ്ങാടി സ്വദേശിയാണ്.

ഉപരിപഠനത്തിന് വേണ്ടി അദ്ദേഹം മസ്ജിദുല്‍ ഹറാമില്‍ കാലങ്ങള്‍ താമസിച്ചിട്ടുണ്ട്. തിരൂരങ്ങാടി നടുവിലെ പള്ളിയിലാണ് മഹാന്‍ അന്ത്യവിശ്രമം കൊള്ളുന്നത്. അതുപോലെ അതിന്റെ മുമ്പ് ഖുതുബുസ്സമാന്‍ സയ്യിദ് അലവി(റ) തങ്ങളവര്‍കളും അതിന്റെ മുമ്പ് മഖ്ദൂം തങ്ങളുടെ മകളുടെ മകനും തിരൂരങ്ങാടിയിലെ ആദ്യത്തെ ഖാളിയുമായ അശ്ശൈഖ് അലി ഹസന്‍ അല്‍ മഖ്ദൂമി തുടങ്ങിയവരും തിരൂരങ്ങാടിയില്‍ വര്‍ഷങ്ങള്‍ ജീവിച്ചവരാണ്.

ഹിജ്റ 1050ല്‍ ജനിച്ച അലി ഹസന്‍ മഖ്ദൂമി 27ാമത്തെ വയസ്സില്‍ 1077ലാണ് തിരൂരങ്ങാടിയില്‍ ഖാളിയായി വരുന്നത്. വലിയ ജുമുഅത്ത് പള്ളിക്ക് മുമ്പില്‍ അന്ത്യവിശ്രമം കൊള്ളുന്നു. എന്നാല്‍ ഇവര്‍ക്കെല്ലാം ശേഷം കേരളത്തില്‍ വലിയ വിജ്ഞാന വിപ്ലവം സൃഷ്ടിച്ച മഹല്‍ വ്യക്തിയും കേരളത്തില്‍ ഇന്ന് ജീവിച്ചിരിപ്പുള്ള പണ്ഡിതന്മാരുടെ പരമ്പര ചെന്നുമുട്ടുന്ന ഖുതുബി മുഹമ്മദ് മുസ്‌ലിയാര്‍, ചെറുശ്ശേരി അഹ്മദ്കുട്ടി മുസ്‌ലിയാര്‍ തുടങ്ങിയ പ്രഗത്ഭ പണ്ഡിതന്മാരുടെയെല്ലാം ഗുരുവര്യരുമായ ചാലിലകത്ത് കുഞ്ഞഹമ്മദ് ഹാജി തിരൂരങ്ങാടിയില്‍ ജീവിച്ച് മരിച്ച മഹാ പണ്ഡിതനാണ്. ഇന്ന് മുജാഹിദുകളുടെ കീഴിലുള്ള തിരൂരങ്ങാടി തറമ്മല്‍ പള്ളിയുടെ മുന്‍വശത്താണ് അദ്ദേഹം അന്ത്യവിശ്രമം കൊള്ളുന്നത്. 1919ലാണ് വിയോഗം.

മഹാനവര്‍കളുടെ ശിഷ്യന്മാരില്‍ പെട്ട കെഎം മൗലവി 1921ല്‍ മാപ്പിള സമരം നടന്നതിനെ തുടര്‍ന്ന് കൊടുങ്ങല്ലൂരിലേക്ക് ഒളിച്ചോടിപ്പോയി. കാലങ്ങള്‍ക്കു ശേഷം വഹാബിയായിട്ടാണ് അദ്ദേഹം തിരിച്ചുവന്നത്. ഇദ്ദേഹമാണ് തിരൂരങ്ങാടിയില്‍ വഹാബിസത്തിന് വിത്ത് പാകിയത്.

ഭാര്യാപിതാവും സ്വന്തം ഗുരുവര്യരുമായ കുഞ്ഞഹമ്മദ് ഹാജി സ്വീകരിച്ചിരുന്നതും പഠിപ്പിച്ചു പോന്നതുമായ സുന്നത്ത് ജമാഅത്തിന്റെ ആദര്‍ശത്തിനെതിരില്‍ ബിദഈ ആദര്‍ശം തിരൂരങ്ങാടിയില്‍ നടപ്പാക്കുന്നതിന് കെഎം മൗലവിയും കൂട്ടാളികളും കിണഞ്ഞ് പരിശ്രമിച്ചു. കുഞ്ഞഹമ്മദ് ഹാജിയുടെ ശേഷം അദ്ദേഹത്തിന്റെ കുടുംബങ്ങളെ അയാള്‍ക്ക് സ്വാധീനിക്കാന്‍ കഴിഞ്ഞു. അങ്ങനെയാണ് കുഞ്ഞഹമ്മദ് ഹാജിയുടെ പ്രസ്സായിരുന്ന സിഎച്ച് പ്രസ്സും അദ്ദേഹത്തിന്റെ പള്ളിയായിരുന്ന തറമ്മല്‍ പള്ളിയും മുജാഹിദുകളുടെ കൈവശത്തിലായത്.

ഈ ബിദ്അത്ത് കുതന്ത്രങ്ങള്‍ക്കെതിരെ അക്കാലത്ത് ശക്തമായി രംഗത്തുവന്നത് ബാപ്പു മുസ്‌ലിയാരുടെ അമ്മാവന്മാരായ ഇബ്റാഹീം കുട്ടി ഹാജി, കോയട്ടി മുസ്‌ലിയാര്‍ അടങ്ങുന്ന ഉലമാ, ഉമറാ സമിതിയായിരുന്നു. ഇന്ന് തിരൂരങ്ങാടിയിലും സമീപത്തും കാണുന്ന മദ്റസകള്‍, പള്ളിദര്‍സുകള്‍ എന്നിവ നടത്തിവരുന്ന ഹിദായതുസ്വിബ്യാന്‍ സംഘത്തിന് രൂപംകൊടുത്തതും ഇവരാണ്.

ആ കാലത്ത് ബിദ്അത്തുകള്‍ക്കെതിരെ ഖണ്ഡന പ്രസംഗങ്ങള്‍ നടത്തുന്നതിന് തയ്യാറാക്കിയ സ്ഥലമാണ് റശീദ് നഗര്‍. സുന്നത്ത് ജമാഅത്തിന്റെ നിരവധി കാര്യങ്ങള്‍ക്ക് സാക്ഷ്യം വഹിച്ച കാമ്പസാണത്. ബാപ്പു മുസ്‌ലിയാരുടെ കുടുംബത്തില്‍പ്പെട്ട മുജാഹിദുകളുടെ പേടിസ്വപ്നവും കണ്ണൂര്‍പുറത്തീല്‍ സ്വദേശിയുമായ റശീദുദ്ദീന്‍ മൂസാന്‍ കുട്ടി മുസ്‌ലിയാരായിരുന്നു പ്രധാനമായും ഖണ്ഡന പ്രസംഗത്തിന് അവിടെയെത്തിയിരുന്നത്. അദ്ദേഹത്തിന്റെ നാമത്തിലേക്ക് സൂചിപ്പിച്ചാണ് റശീദ് നഗര്‍ എന്നറിയപ്പെട്ടത്. ശേഷം പതി അബ്ദുല്‍ ഖാദിര്‍ മുസ്‌ലിയാര്‍, ഇകെ ഹസന്‍ മുസ്ലയാര്‍, വാണിയമ്പലം അബ്ദുറഹ്മാന്‍ മുസ്‌ലിയാര്‍, ആമയൂര്‍ മുഹമ്മദ് മുസ്‌ലിയാര്‍ തുടങ്ങിയവരെല്ലാം സുന്നത്ത് ജമാഅത്തിനുവേണ്ടി പ്രസംഗം നടത്താന്‍ പല പ്രാവശ്യങ്ങളിലായി അവിടെ വന്നിട്ടുള്ളവരാണ്.

സമസ്തയിലെ പിളര്‍പ്പിന് ശേഷം താജുല്‍ ഉലമയുടെയും കാന്തപുരം ഉസ്താദിന്റെയും കൂടെ തിരൂരങ്ങാടിയിലും പരിസര പ്രദേശത്തുമുള്ള സുന്നികള്‍ ഉറച്ചുനില്‍ക്കാന്‍ കാരണമായതും ഇതുതന്നെയാണ്. ദീനിന്റെ മൊത്ത കുത്തക അവകാശപ്പെടുന്ന ചില രാഷ്ട്രീയക്കാരുടെ വലയില്‍ പെട്ട ചിലരൊക്കെ സുന്നിമുജാഹിദ് തര്‍ക്കം ശാഖാപരം മാത്രമാണെന്ന് കരുതി സുന്നികളുടെ പള്ളി, മദ്റസ പോലെയുള്ള സ്ഥാപനങ്ങളുടെ കമ്മിറ്റിയില്‍ വരെ യാതൊരു വേര്‍തിരിവും കൂടാതെ എല്ലാവരെയും കടത്തിക്കൂട്ടിയിരുന്ന അക്കാലത്തുതന്നെ സുന്നികള്‍ വേര്‍തിരിഞ്ഞ ചരിത്രമാണ് തിരൂരങ്ങാടിക്കുള്ളത്.

1925ല്‍ സമസ്ത കേരള ജംഇയ്യത്തുല്‍ ഉലമ രൂപംകൊണ്ടിരുന്നെങ്കിലും അത് ഉലമാ സംഘടനയായി മാത്രം നിലനിന്നതുകൊണ്ട് മുസ്‌ലിം ബഹുജനങ്ങളിലേക്ക് അതിന്റെ പ്രവര്‍ത്തനം വേണ്ടത്ര ഇറങ്ങിച്ചെന്നിരുന്നില്ല. ഇത് മനസ്സിലാക്കിയ പണ്ഡിതര്‍ 1954ല്‍ സുന്നി യുവജന സംഘത്തിന് രൂപം നല്‍കി. മര്‍ഹൂം പാണക്കാട് പൂക്കോയ തങ്ങള്‍, ചാപ്പനങ്ങാടി ബാപ്പു മുസ്‌ലിയാര്‍, പൂന്താവനം അബ്ദുല്ല മുസ്‌ലിയാര്‍ തുടങ്ങി പലരും സംഘടനയുടെ സാരഥ്യം വഹിച്ചവരാണ്. ഇകെ ഹസന്‍ മുസ്‌ലിയാര്‍ പ്രസിഡന്‍റും കാന്തപുരം ഉസ്താദ് ജനറല്‍ സെക്രട്ടറിയുമായി വന്നതോടെ അതിന്റെ പ്രവര്‍ത്തനം സജീവമായി. ഹസന്‍ മുസ്‌ലിയാര്‍ക്ക് ശേഷം നൂറുല്‍ ഉലമ എംഎ ഉസ്താദും കാന്തപുരം ഉസ്താദും ദീര്‍ഘകാലം സംഘടനയെ നയിച്ചുകൊണ്ടിരുന്നു. ഈ കാലഘട്ടങ്ങളിലാണ് ബിദഈ കക്ഷികളുമായുള്ള പൂര്‍ണവേര്‍തിരിവും തനിമയും സുന്നികള്‍ക്ക് നിലനിര്‍ത്തിപ്പോരാനായത്. ഈ കഥകളെല്ലാം വിവരിച്ച് ബാപ്പു മുസ്‌ലിയാര്‍ തമാശയില്‍ ഇപ്രകാരം പറയാറുണ്ട്; നിങ്ങള്‍ക്കെല്ലാം സുന്നികളുടെ തനിമ ലഭിച്ചത് എസ്വൈഎസിന്റെ പ്രവര്‍ത്തനം ശക്തിയായതു മുതലാണെങ്കില്‍ അതിന്റെ പതിറ്റാണ്ടുകള്‍ക്ക് മുമ്പ് തന്നെ തിരൂരങ്ങാടിയിലെ സുന്നികള്‍ തനിമ നിലനിര്‍ത്തിപ്പോരുന്നവരായിരുന്നു.”

പതി അബ്ദുല്‍ഖാദിര്‍ മുസ്‌ലിയാരുടെ കഴിവുകളെക്കുറിച്ച് പറഞ്ഞപ്പോള്‍ ബാപ്പു മുസ്‌ലിയാര്‍ അനുസ്മരിച്ചത് ഇവിടെ ചേര്‍ക്കാം. എടവണ്ണ അലവി മൗലവിയും മറ്റും തിരൂരങ്ങാടിയില്‍ പ്രസംഗങ്ങള്‍ നടത്തുമ്പോള്‍ അവര്‍ തട്ടിവിട്ട വിവിധ ഗ്രന്ഥങ്ങളുടെ ഉദ്ധരണങ്ങള്‍ ഞാന്‍ കുറിച്ചുവെക്കാറുണ്ടായിരുന്നു. പതി “റദ്ദ്” പ്രസംഗത്തിന് വന്നാല്‍ ഇത് അദ്ദേഹത്തെ വായിച്ചുകേള്‍പ്പിക്കും. അപ്പോള്‍ മുമ്പിന്‍ ഭാഗങ്ങള്‍ അടക്കം വാചകം പൂര്‍ണമായി വായിച്ച് കൊടുക്കാന്‍ പതി ആവശ്യപ്പെടും. റാസി, തുഹ്ഫ, അടക്കമുള്ള ഗ്രന്ഥങ്ങളില്‍ നിന്ന് ഞാന്‍ വായിച്ചുകൊടുക്കുന്ന ഭാഗങ്ങള്‍ കേള്‍ക്കുന്നതോടെ അത് ഹൃദ്യസ്ഥമാക്കും. മൂന്നും നാലും മണിക്കൂറുകള്‍ നീണ്ടുനില്‍ക്കുന്ന പ്രസംഗത്തിനിടയില്‍ ആ ഉദ്ധരണങ്ങളെല്ലാം ഇടതടവില്ലാതെ വായിച്ച് വിഷയം സമര്‍ത്ഥിക്കും. ഇത് വല്ലാത്തൊരു കഴിവായിരുന്നു.”

എല്ലാ വിജ്ഞാന ശാഖകളിലും സാഗരതുല്യമായ ബാപ്പു മുസ്‌ലിയാര്‍ ബിദഇകളെ “റദ്ദ്” ചെയ്യുന്ന വിഷയത്തിലും നല്ല ജ്ഞാനിയായിരുന്നെങ്കിലും പ്രസംഗകനല്ലാത്തതു കൊണ്ടാണ് പൊതുജനങ്ങള്‍ക്ക് അദ്ദേഹത്തിന്റെ ശബ്ദം കേള്‍ക്കാനാകാതിരുന്നത്. ദീര്‍ഘമായ കാലം ദര്‍സ് നടത്തിയത് കൊണ്ട് നല്ലൊരു ശിഷ്യസമ്പത്തും ബാപ്പു മുസ്‌ലിയാര്‍ക്കുണ്ട്.

പൊന്മള അബ്ദുല്‍ഖാദിര്‍ മുസ്‌ലിയാര്‍

ബാപ്പു ഉസ്താദിന്റെ കവിത

Menu

ഹായ്…ഹെന്ത് രസണ്ട് ന്റെ.. ബാപ്പ്വോ..
●
0 COMMENTS🍔🍿🍔🍿🍔🍿
അഹ്ലുസ്സുന്നയുടെ ആദർശ പഠനത്തിന്  ഇസ്ലാമിക് ഗ്ലോബൽ വോയ്സ് ബ്ലോഗ്    ഉപയോഗപ്പെടുത്തുക

https://islamicglobalvoice.blogspot.in/?m=0


തിരുപ്രകീര്‍ത്തന കവിതകളില്‍ ബുര്‍ദ കഴിഞ്ഞാല്‍ എന്നെ ഏറെ സ്വാധീനിച്ചത് തിരൂരങ്ങാടി ബാപ്പു ഉസ്താദിന്റെ കവിതകളാണ്. ആ കവിതയും അതിന്റെ ഉടമയുമായി ശൈശവ ബാല്യ കൗമാര യൗവ്വന കാലങ്ങളില്‍ വ്യത്യസ്തമായ ബന്ധം പുലര്‍ത്താന്‍ കഴിഞ്ഞു.
അരീക്കോട് മജ്മഇല്‍ ആഴ്ചയിലൊരിക്കല്‍ ഉസ്താദ് വരാറുണ്ടായിരുന്നു; ഫത്ഹുല്‍ മുഈന്‍ ദര്‍സ് നടത്താന്‍. അങ്ങനെയാണ് കൗമാരത്തില്‍ ഉസ്താദിന്റെ ശിഷ്യത്വം സ്വീകരിക്കുന്നത്. എങ്കിലും ബാല്യകാലത്തുതന്നെ അവിടുത്തെ പ്രവാചക കീര്‍ത്തനങ്ങളുമായി ഹൃദയബന്ധമുണ്ടായിരുന്നു. കുഞ്ഞായിരിക്കുന്ന കാലത്ത് എന്നെ മന്ത്രിക്കാന്‍ വേണ്ടി ബാപ്പു ഉസ്താദിന്റെ അടുക്കല്‍ കൊണ്ടുപോയതായി ഉമ്മ പറയുന്നത് കേട്ടിട്ടുണ്ട്. ശൈശവത്തിലേറ്റുവാങ്ങിയ ആ മന്ത്രത്തിന്റെ ആത്മാവായിരിക്കാം വര്‍ത്തമാന കാലത്തും എന്നില്‍ ഒരു ഹൃദയവികാരം കെടാതെ നിലനിര്‍ത്തുന്നത്.
കുണ്ടൂര്‍ ഗൗസിയ്യയില്‍ എട്ടാം ക്ലാസില്‍ പഠിക്കുന്ന കാലത്താണ് ആദ്യമായി ഉസ്താദിന്റെ കവിത കിട്ടിയത്. ഹുജ്റാ ശരീഫില്‍ സുന്ദരമായ കാലിഗ്രാഫിയില്‍ സ്വര്‍ണ്ണ ലിപികളാല്‍ ആലേഖനം ചെയ്യപ്പെട്ട ഹബീബുല്‍ ഹബ്ശി(റ)ന്റെ ഖസീദയുടെ പഞ്ചവത്കരണമായിരുന്നു (തഖ്മീസ്) അത്. അന്നു തന്നെ അത് അര്‍ത്ഥസഹിതം മനഃപാഠമാക്കാന്‍ ശ്രമിച്ചു. ആ ബയ്ത് തുടങ്ങുന്നതിങ്ങനെയാണ്:
യാ മല്‍ജഈ യാഹബീബല്‍ വാഹിദിസ്സ്വമദി


യാ മുന്‍ഖിദല്‍ ഖല്‍ഖി മിന്‍ അഹ്വാലി ഹൗലി ഗദി
വകുല്ലുഹും ഫീഹി ദുഖ്രീ ഇലൈക സ്വദീ
യാ സയ്യദീ യാ റസൂലല്ലാഹി ഖുദ് ബിയദീ
എന്‍റഭയമേ, ഏക ഇലാഹിന്‍ ഹബീബോരേ
സൃഷ്ടികളെല്ലാം ബേജാറിലായിരിക്കേ
നാളെയുടെ വിഹ്വലതകളില്‍ നിന്നവരെ കാക്കുന്നോരേ
രക്ഷകാ, അങ്ങയിലേക്കു ഞാന്‍ ദാഹാര്‍ത്തനാണ്
എന്‍ കരങ്ങള്‍ പിടിക്കൂ നബിയേ..
തിരുനബിയെ വിളിച്ച് കൊണ്ട് തന്നെയാണ് കവിത വികസിക്കുന്നത്.
യാമന്‍ യഖൂമു മഖാമല്‍ ഹംദി മുന്‍ഫരിദാ
ലില്‍ വാഹിദില്‍ ഫര്‍ദി ലം യൂലദ് വലംയലിദീ
യാമന്‍ തഫജ്ജറതില്‍ അന്‍ഹാറു നാബിഅതന്‍
മിന്‍ ഇസ്ബഅയ്ഹി ഫ അര്‍വല്‍ ജയ്ശ ബില്‍മദദി
ജനകനോ ജാതനോ അല്ലാത്ത ഏകനാം നാഥന്റെ
മഖാമുന്‍ മഹ്മൂദിലൊറ്റയാനായ് നില്‍ക്കുന്നോരേ..
കൈവിരലുകളില്‍ നിന്ന് തെളിനീര്‍ പുഴയൊഴുക്കി
വമ്പന്‍ സൈന്യത്തിന്റെ ദാഹമകറ്റിയോരേ….


ആ കവിതയുമായുള്ള സഹവാസം ഞാന്‍ വിട്ടില്ല. ഉസ്താദിന്റെ മറ്റു കവിതകള്‍ കൂടി മനസ്സിനെ കോരിത്തരിപ്പിച്ചുകൊണ്ടിരുന്നു. തിരുസ്നേഹം പ്രകടിപ്പിക്കാന്‍ ഒറ്റക്കിരുന്ന് അത് ചൊല്ലിക്കൊണ്ടിരിക്കും.
ഇന്നീ വഇന്‍ കുന്‍തു ലം ഉക്സിര്‍ മിനല്‍ അമലി
വമന്‍തഹയ്തു അനില്‍ ഇസ്വ്യാനി വസ്സലലി
ഉഹിബ്ബുഹു വഹുവ യക്ഫീനീ വ ദാഅമലി
ബിഹില്‍തജഅ്തു ലഅല്ലല്ലാഹ യഗ്ഫിറു ലീ
ഹാദല്ലദീ ഹുവ ളന്നീ വഹുവ മുഅ്തഖദീ…
കര്‍മ്മങ്ങളനവധിയില്ലെങ്കിലും
തെറ്റുകളെമ്പാടുമുണ്ടെങ്കിലുംമൊരു പ്രതീക്ഷയുണ്ട്;
ഞാന്‍ അവിടത്തെ സ്നേഹിക്കുന്നുവല്ലോ
അതുകൊണ്ട് ഞാനഭയം തേടുന്നു
അതാണെന്റെ ധാരണ; എന്റെ വിശ്വാസം
എന്നൊക്കെ പാടുമ്പോള്‍ നാമാകെ കുളിരണിയും..
ഇമാം അബൂഹനീഫ(റ)യുടെ ഖസീദതുന്നുഅ്മാനിയ്യയിലെ വരികള്‍ക്ക് പൊന്നാടയണിച്ച് ബാപ്പു ഉസ്താദ് പാടിയ വരികള്‍ ആരെയാണ് പുളകം കൊള്ളിക്കാതിരിക്കുക!.
ആവില്ല സൃഷ്ടികള്‍ക്കൊരാള്‍ക്കുമേ കുറിക്കുവാന്‍
വൃദ്ധന്‍,യുവാക്കള്‍,കുരുന്നുകള്‍ കൂടിലും
ഊഴിമുഴുക്കെ നിവര്‍ത്തീ കടലാസി
ലേഴു സമുദ്രം മഷിയാക്കി പുല്ലുകള്‍
പേനയാക്കീടിലും കൂട്ടിന്നു ജിന്നുകള്‍
ഒന്നായിരിക്കിലും ക്ലേശങ്ങളേല്‍ക്കിലും
ഒട്ടിട വിശ്രമം കൂടാതെയെത്ര നാള്‍
കൂടിയാലും നാമെഴുതിക്കഴിയുമോ?
സ്വല്‍പം ചരിതത്തെ ശേഖരിച്ചീടുമോ?
ഉള്ളം നിറക്കാന്‍ നബിയെ പുകഴ്ത്താ
നാകില്ല നിശ്ചയം, അല്ലാഹു സാക്ഷിയാ..
ആസക്തിയെയും അതിന്റെ മധുരം പുരട്ടിയ ഉപകരണങ്ങളെയും ചിഹ്നങ്ങളെയും വിസമ്മതിച്ച് കൊണ്ട് ഇമാം അബൂഹനീഫ(റ)യുടെ വരികള്‍ക്ക് മറ്റൊരിടത്ത് ആമുഖം പറഞ്ഞത് ഇങ്ങനെ:
മഅ്ബദിന്റെ മകളെയും സ്തനം തുടുത്ത ഉനൈസയെയും ആര്‍ക്കു വേണം?
അവരെയോര്‍ത്ത് ഞാന്‍ നേരം കളയുന്നില്ല.
പ്രത്യുത എന്റെ ആത്മാവ് മുഴുവനും മുഹമ്മദോരില്‍ നിമഗ്നമായിരിക്കുന്നു
നേതാവേ,അങ്ങയില്‍ വിലയിച്ച ഒരു കുഞ്ഞു ഹൃദയമെനിക്കുണ്ട്;
അങ്ങയോടുള്ള പ്രേമം നിറഞ്ഞ് നില്‍ക്കുന്ന ജീവന്റെ തുടിപ്പും
മദ്ഹബിന്റെ ഇമാമും ആഗോള മുസ്‌ലിംകള്‍ക്ക് സ്വീകാര്യനുമായ ഇമാം അബൂഹനീഫ(റ) തന്റെ കവിത മദ്ഹിലും സ്നേഹപ്രകടനങ്ങളിലും ഒതുക്കിയില്ല. മറ്റു ഇമാമുകളൊക്കെ ചെയ്ത പോലെ തിരുനബിയെ വിളിച്ച് സഹായം ചോദിക്കുന്നുണ്ട്.ഈ സഹായാര്‍ത്ഥന ബാപ്പു മുസ്‌ലിയാരുടെ കവിതകളിലും നിറഞ്ഞ് നില്‍ക്കുന്നു:
കുഴപ്പങ്ങളില്‍ നിന്ന് രക്ഷിക്കുന്നവരേ
അങ്ങയിലാണെന്‍റഭയം
പ്രയാസം സഹിക്കുന്നവരുടെയത്താണിയേ
അഭയം ! അങ്ങയില്‍ നിന്നൗദാര്യവും
ഐശ്വര്യവും പ്രതീക്ഷിക്കുന്നു ഞാന്‍
എന്തിന് വ്യാകുലപ്പെടണം?
തുടര്‍ന്ന് അബൂഹനീഫ(റ)യുടെ വരികളില്‍ ഇങ്ങനെയാണ് കാണുന്നത്:
അങ്ങയുടെ ഔദാര്യം കൊതിക്കുന്നു ഞാന്‍
അബൂ ഹനീഫക്ക് സൃഷ്ടികളിലങ്ങല്ലാതെയാരുമില്ല.
എന്നാല്‍ ഈ വരി ചൊല്ലുമ്പോഴാണ് രോമകൂപങ്ങള്‍ എഴുന്നേറ്റു നില്‍ക്കുക. പ്രേമത്തിന്റെ പ്രകാരങ്ങള്‍ അകതാരില്‍ പുഷ്പിച്ചു നില്‍ക്കുക:
വഇദാ ഖസദ്തു ഫഫീക ഖസ്ദീ കുല്ലുഹു
വഇദാ ഫഅല്‍തു ഫഫീക ഫിഅ്ലീ കുല്ലുഹു
വഇദാ തറക്തു ഫഫീക തര്‍കീ കുല്ലുഹു
വഇദാ സകത്തു ഫഫീക സ്വുംതീ കുല്ലുഹു
വഇദാ നതഖ്തു ഫമാദിഹന്‍ ഉല്‍യാകാ…
നിനച്ചതോ അങ്ങയെ മാത്രം
ചെയ്തതോ അങ്ങേയ്ക്ക് മാത്രം
ഉപേക്ഷയും അങ്ങേയ്ക്ക് മാത്രം
മൗനവും അങ്ങേയ്ക്ക് മാത്രം
വചനമോ അങ്ങയുടെ മദ്ഹുമാത്രം…
വെറുതെയായിരിക്കുമോ ഈ മുഖമ്മസിലെ വരികള്‍ ബാപ്പു ഉസ്താദ് തന്റെ ഗുരുവായ ഒ.കെ ഉസ്താദിന് കാണിച്ച് കൊടുത്തപ്പോള്‍ ശിഷ്യന്റെ തോളില്‍ കയ്യിട്ട് നെഞ്ചിലേക്ക് ചേര്‍ത്ത് വെച്ച് അവിടുന്ന് ഇങ്ങനെ പറഞ്ഞത്: “ഹായ്.. ഹെന്ത് രസണ്ട് ന്റെ ബാപ്പ്വോ…”
അതി സുന്ദരവും കര്‍ണാനന്ദകരവും ഏച്ചുകെട്ടലുകളില്‍ നിന്ന് മുക്തവുമായ ബദ്ര്‍ ബൈത്ത് ഉസ്താദ് രചിച്ചിട്ടുണ്ട്. പലയിടത്തും അത് ചൊല്ലിവരുന്നുമുണ്ട്. ഒരു ദിവസം വന്ദ്യഗുരു സുലൈമാന്‍ ഉസ്താദിനെ സന്ദര്‍ശിക്കാന്‍ ചെന്നപ്പോള്‍ ഉസ്താദുണ്ട് ഭക്തിയാദരവുകളോടെ ഏതോ ഒരു ഏടില്‍ നോക്കി എന്തോ ചൊല്ലിക്കൊണ്ടിരിക്കുന്നു. ഞാന്‍ സൂക്ഷിച്ചു നോക്കി. ബാപ്പു ഉസ്താദിന്റെ “അസ്ബാബുന്നസ്വര്‍ ബിഅസ്വ്ഹാബില്‍ ബദ്ര്‍” എന്ന ബദ്ര്‍ ബൈത്തിന്റെ ഏടായിരുന്നു അത്!
ഉസ്താദിന്റെ കവിതകളില്‍ മറ്റൊരു വിഭാഗമാണ് മര്‍സിയ്യതുകള്‍ (അനുശോചന കാവ്യം). ശൈഖ് ആദം ഹസ്രത്ത്, ഉത്തമ പാളയം അബൂബക്കര്‍ ഹസ്രത്ത്, ആത്മീയ ഗുരു ആലുവായ് അബൂബക്കര്‍ മുസ്‌ലിയാര്‍, കുണ്ടൂര്‍ അബ്ദുല്‍ഖാദിര്‍ മുസ്‌ലിയാര്‍, മകന്‍ കുഞ്ഞു തുടങ്ങി ധാരാളം പണ്ഡിതര്‍, സ്വൂഫികള്‍, സാധാരണക്കാര്‍ എന്നിവരെക്കുറിച്ചൊക്കെ മര്‍സിയത്തുകളെഴുതി. ബാഖിയാത്തിന്റെ ശില്‍പിയെക്കുറിച്ചെഴുതിയ മര്‍സിയത് അവിടെ സംഘടിപ്പിക്കപ്പെട്ട ഒരു മല്‍സരത്തിന്റെ ഫലമായിരുന്നുവത്രെ. ഒന്നാം സ്ഥാനം ഉസ്താദിന്റെ കവിതക്കാണ് കിട്ടിയത്. ഹൈദരാബാദിലെ ഇഫ്ലൂ യൂനിവേഴ്സിറ്റിയില്‍ ഇന്‍റോ അറബിക് ലിറ്ററേച്ചറില്‍ ഈ കവിത പഠിപ്പിക്കാന്‍ ഈ അടുത്ത് തീരുമാനമായിട്ടുണ്ട്. ഡല്‍ഹിലെ ജവഹര്‍ലാല്‍ നെഹ്റു യൂനിവേഴ്സിറ്റിയില്‍ ഉസ്താദിന്റെ മര്‍സിയതുകള്‍ തര്‍ക്കമന്യെ ഗവേഷണ വിഷയമായി അംഗീകരിക്കപ്പെട്ടത് നിസ്തുല സര്‍ഗ ശക്തി കൊണ്ടായിരിക്കണം. ഇഫ്ലുവില്‍ ഉസ്താദിന്റെ മൊത്തം കവിതകളെ കുറിച്ചുള്ള ഗവേഷണത്തിന് ഈ വിനീതന് അവസരം ലഭിച്ചതും മറ്റൊന്നുകൊണ്ടുമായിരിക്കില്ല.
സമസ്ത അറുപതാം വാര്‍ഷിക വേദിയിലെ ഹരമായി മാറി വിശ്വാസി നാവിന്‍തുമ്പുകള്‍ ഏറ്റുപിടിച്ച വാഹന്‍ ലക മിന്‍ ഇസ്സിന്‍ ളഹറ, തന്റെ ആത്മമിത്രവും സുന്നി പ്രസ്ഥാനത്തിന്റെ അമരക്കാരനുമായ മൗലാനാ കാന്തപുരം റിയാദില്‍ തടവിലാക്കപ്പെട്ടപ്പോള്‍ രചിച്ച ബുശ്റാലക, ധര്‍മപുരിയില്‍ സുന്നി വിദ്യാര്‍ത്ഥിപ്പടക്ക് വീര്യം പകര്‍ന്ന യാ ഹുമാത ദീനിനാ എന്നിയവയൊക്കെ ആശംസാഗാനങ്ങളില്‍ സുപ്രധാനമാണ്. ചേറൂര്‍ ശുഹദാക്കളെക്കുറിച്ചെഴുതിയ മൗലിദിനെ പരിഷ്കാരിയായ സിഎന്‍ അഹ്മദ് മൗലവി പോലും പ്രശംസിച്ചിട്ടുണ്ട്.
ഇടക്കിടെ ഉസ്താദിനെ കാണാന്‍ ചെല്ലുമായിരുന്നു. ചായ തരും, അറിവ് തരും, കവിത തരും,സ്നേഹം തരും, തമാശ തരും, ആശ്വാസം തരും, ഇശ്ഖുന്നബീ തരും.. നഷ്ടപ്പെട്ടതാരാണ്? മക്കള്‍ക്ക് സ്നേഹമുള്ള പിതാവ്, ശിഷ്യര്‍ക്ക് വത്സലനായ ഗുരു, വിജ്ഞാന കേരളത്തിന് ആഴമുള്ള പണ്ഡിതന്‍, സാഹിത്യ ലോകത്തിന് സര്‍ഗ ധനനായ പ്രതിഭ.
അല്ലാഹ്.. ഞങ്ങളുടെ ഉസ്താദിന്റെ ആത്മാവിന് നീ ശാന്തി നല്‍കണേ.
ഫൈസല്‍ അഹ്സനി രണ്ടത്താണി

ആത്മാവും ശരീരവും عالم الارواح

🍔🍿🍔🍿🍔🍿
അഹ്ലുസ്സുന്നയുടെ ആദർശ പഠനത്തിന്  ഇസ്ലാമിക് ഗ്ലോബൽ വോയ്സ് ബ്ലോഗ്    ഉപയോഗപ്പെടുത്തുക

https://islamicglobalvoice.blogspot.in/?m=0
ആത്മാവും ശരീരവും● 0 COMMENTS

മനുഷ്യ സൃഷ്ടിപ്പിന്റെ ആദ്യഘട്ടത്തില്‍ മുഴുവന്‍ മനുഷ്യാത്മാക്കളുടെയും സംഗമവും കരാറും ആലമുല്‍ അര്‍വാഹില്‍ വെച്ച് നടന്നു. “നാഥന്‍ ആദം സന്തതികളെ പുറത്ത് കൊണ്ടുവരികയും അവരെ സാക്ഷീകരണം നടത്തുകയും ചെയ്തു.(അല്ലാഹു ചോദിച്ചു) ഞാന്‍ നിങ്ങളുടെ നാഥനല്ലയോ? അവര്‍ അതേ, ഞങ്ങള്‍ സാക്ഷ്യം വഹിക്കുന്നു എന്ന് പറയുകയുണ്ടായി” (അഅ്റാഫ് 172). പ്രഥമ മനുഷ്യന്‍ ആദം(അ) സൃഷ്ടിക്കപ്പെട്ടയുടനെ പിറക്കാനിരിക്കുന്ന മുഴുവന്‍ മനുഷ്യരെയും അദ്ദേഹത്തിന്റെ മുതുകില്‍ നിന്ന് പുറത്ത് കൊണ്ടുവന്ന് അല്ലാഹു നടത്തിയ കരാറിനെക്കുറിച്ചാണ് ഈ സൂക്തത്തില്‍ പ്രതിപാദിക്കുന്നത്. “അതി സൂക്ഷ്മ ജീവികളായിരുന്നു അന്നവര്‍. അവരുടെ നെറ്റിയില്‍ പ്രത്യേക പ്രകാശം പരക്കുന്നുണ്ടായിരുന്നു” (മിശ്കാത്ത്). ഉടന്‍ സൃഷ്ടിക്കപ്പെടാനിരിക്കുന്നവരും ലോകാവസാനം വരെ വരാനിരിക്കുന്നവരുമായ സ്ത്രീ പുരുഷ, കാലദേശ വര്‍ണ വര്‍ഗാന്തരങ്ങളിലുള്ളവരെല്ലാം അതിലുണ്ടായിരുന്നു.

ഖുര്‍ആന്‍ വ്യാഖ്യാതാക്കള്‍ വിശദീകരിക്കുന്നു; “”ഭൂജാതരാവാനിരിക്കുന്ന മുഴുവന്‍ മനുഷ്യരെയും ആത്മീയലോകത്ത്(ആലമുല്‍ അര്‍വാഹില്‍) ഒരുമിച്ച് കൂട്ടി. നാല് അണികളിലായി എല്ലാവരെയും നിര്‍ത്തി. മുന്നണിയില്‍ പ്രവാചകന്മാരും അവരുടെ പിന്നണിയില്‍ ഔലിയാക്കളും തൊട്ടുപിറകില്‍ സത്യ വിശ്വാസികളും ഒടുവില്‍ അവിശ്വാസികളും. ശേഷം നാഥന്‍ ചോദിച്ചു, ഞാന്‍ നിങ്ങളുടെ രക്ഷിതാവല്ലയോ? പ്രവാചകന്മാര്‍ തടസ്സങ്ങളൊന്നുമില്ലാതെ തന്നെ മറുപടി പറഞ്ഞു. തന്മൂലം അവര്‍ ഭൂമിയില്‍ അതുല്യസൃഷ്ടികളായി മാറി, തന്നെയുമല്ല മധ്യവര്‍ത്തികളില്ലാതെ നാഥന്‍ അവര്‍ക്ക് ദൈവീകവചനങ്ങള്‍ അറിയിച്ചു കൊടുക്കുകയും ചെയ്തു.

ഔലിയാക്കളിലേക്ക് പ്രസ്തുത ചോദ്യം ചെന്നെത്തിയത് പ്രവാചകാത്മാക്കളുടെ പ്രകാശത്തില്‍ സ്പര്‍ശിച്ചുകൊണ്ടായിരുന്നു. അതുമൂലം ഭൂമിലോകത്ത് അവര്‍ക്കും അല്ലാഹുവിനുമിടയില്‍ പ്രവാചകശ്രേഷ്ഠര്‍ മധ്യവര്‍ത്തികളായി. പിന്നണിയിലെ വിശ്വാസികള്‍ പ്രസ്തുത ചോദ്യം ശ്രവിച്ചത് രണ്ടുവിഭാഗത്തിന്റെയും ആത്മീയ പ്രകാശത്തില്‍ നിന്നായിരുന്നു. അതിനാല്‍ പവിത്രതയില്‍ രണ്ടുവിഭാഗത്തിന്റെയും പിന്നിലായി അവര്‍. ഒടുവില്‍ നിലയുറപ്പിച്ച അവിശ്വാസികളും കപടവിശ്വാസികളും ഒരു അപശബ്ദമാണ് കേട്ടത്. തങ്ങള്‍ക്ക് വ്യക്തമല്ലാത്ത ദൈവീക ഉടമ്പടിക്ക് മുമ്പില്‍ മുന്നണിയിലുള്ളവര്‍ “അതേ”യെന്ന് പറയുന്നത് കേട്ട് അവരും അങ്ങനെ പ്രതികരിച്ചു. അതുവഴി അവര്‍ ഭൂമിയില്‍ അധമന്മാരും കപടന്മാരുമായി അധഃപതിച്ചു (ആശയം, റൂഹുല്‍ ബയാന്‍ 1/223).

ഖുര്‍ആന്‍ പറയുന്നു: “”പ്രവാചകന്മാരില്‍ നിന്നും നാഥന്‍ കരാര്‍ സ്വീകരിച്ച സന്ദര്‍ഭം ഓര്‍ക്കുക. നാം നിങ്ങള്‍ക്ക് ഗ്രന്ഥവും വിജ്ഞാനവും നല്‍കി. ശേഷം നിങ്ങളുടെ പക്കലുള്ളത് സത്യപ്പെടുത്തുന്ന ഒരു ദൂതന്‍ നിങ്ങളില്‍ നിയോഗിതനായാല്‍ തീര്‍ച്ചയായും നിങ്ങള്‍ ആ പ്രവാചകനില്‍ വിശ്വസിക്കുകയും സഹായിക്കുകയും ചെയ്യണം. (ശേഷം) അല്ലാഹു ചോദിച്ചു: നിങ്ങള്‍ സമ്മതിച്ചുവോ? അവര്‍ പറഞ്ഞു: ഞങ്ങള്‍ സമ്മതിച്ചു”“(ആലുഇംറാന്‍ 81) മനുഷ്യന്റെ പ്രയാണം ആരംഭിച്ചത് തന്നെ സ്രഷ്ടാവുമായുള്ള ഈ ഉടമ്പടിയോടെയാണെന്ന് ഗ്രഹിക്കാം. നന്മയോടും സത്യത്തോടും ആഭിമുഖ്യമുണ്ടാകും വിധം സൃഷ്ടിക്കപ്പെട്ട മനുഷ്യന്‍ പ്രകൃത്യാ പ്രപഞ്ച നാഥനോട് കടമപ്പെട്ടവരാണ്.

പിതാവിന്റെ മുതുക്, മാതാവിന്റെ ഉദരം

ആത്മീയ ലോകത്തെ കൂടിക്കാഴ്ച്ചക്ക് ശേഷം മനുഷ്യന്‍ തന്റെ പ്രയാണ പരിണാമത്തില്‍ പിതാവിന്റെ മുതുകില്‍ (ആലമുല്‍ അസ്വ്ലാബില്‍) എത്തിച്ചേര്‍ന്നു. ആ ശുക്ലത്തില്‍ അടങ്ങിയിരിക്കുന്ന ദശലക്ഷക്കണക്കിന് ബീജങ്ങളില്‍ നിന്ന് ഒന്നിനെ മാത്രം തെരഞ്ഞെടുത്തു. നാഥന്‍ ചോദിക്കുന്നു: “സ്രവിക്കുന്ന ശുക്ലത്തെക്കുറിച്ച് നിങ്ങള്‍ ചിന്തിച്ചിട്ടുണ്ടോ? നിങ്ങളാണോ, അതോ നാമാണോ അതിന്റെ സൃഷ്ടി കര്‍ത്താവ്” (വാഖിഅ/59). ശാസ്ത്രം ഭ്രൂണത്തെക്കുറിച്ച് ചിന്തിക്കുന്നതിന്റെ നൂറ്റാണ്ടുകള്‍ക്കുമുമ്പാണ് വിശുദ്ധ ഖുര്‍ആന്‍ ഈ യാഥാര്‍ത്ഥ്യം വിളിച്ചോതുന്നതെന്നോര്‍ക്കണം.

ശുക്ലം മാതാവിന്റെ ഗര്‍ഭപാത്രത്തില്‍ നിക്ഷേപിച്ചു. അല്ലാഹു പറയുന്നു: “നിശ്ചയം മനുഷ്യനെ കളിമണ്ണിന്റെ സത്തയില്‍ നിന്ന് നാം സൃഷ്ടിച്ചു. പിന്നീട് അതിനെ നാം ഭ്രൂണമാക്കി രൂപപ്പെടുത്തി. ഭ്രൂണത്തെ മാംസപിണ്ഡമാക്കി, മാംസപിണ്ഡത്തെ അസ്ഥികൂടമാക്കി, അസ്ഥികൂടത്തെ നാം മാംസം കൊണ്ട് ആവരണം ചെയ്തു. പിന്നീടതിനെ മറ്റൊരു സൃഷ്ടിയാക്കി വളര്‍ത്തിക്കൊണ്ടുവന്നു. ഏറ്റവും വലിയ സൃഷ്ടികര്‍ത്താവായ നാഥന്‍ അനുഗ്രഹ സമ്പൂര്‍ണനാകുന്നു” (മുഅ്മിനൂന്‍ /1214).

ഗര്‍ഭാശയത്തില്‍ വെച്ച് അല്ലാഹു അതിന് മനുഷ്യരൂപം നല്‍കി. കേള്‍വിയും കാഴ്ചയും ചര്‍മവും സൃഷ്ടിച്ചു. ശേഷം അതില്‍ ആത്മാവിനെ പ്രതിനിധിയാക്കുകയും മാതാവ് കഴിക്കുന്ന ഭക്ഷണ പദാര്‍ത്ഥങ്ങളിലെ പോഷകങ്ങള്‍ ഞരമ്പ് വഴി ഗര്‍ഭസ്ഥ ശിശുവിലേക്ക് അല്ലാഹു എത്തിച്ചു കൊടുക്കുകയും ചെയ്തു. അതോടെയാണ് മനുഷ്യകുഞ്ഞ് ജീവിതയാത്രയിലേക്ക് പ്രവേശിക്കുന്നത്.

ശാരീരിക ലോകം

ശാരീരിക ലോകത്ത് (ആലമുല്‍ അജ്സാദ്) എത്തിച്ചേര്‍ന്ന മനുഷ്യനെ അല്ലാഹു അത്ഭുത സൃഷ്ടിയായാണ് രൂപപ്പെടുത്തിയത്. സുന്ദരമായ ആകാരം, നട്ടെല്ലില്‍ നിവര്‍ന്നു നില്‍ക്കാനുള്ള ശേഷി, വാഹനങ്ങളൊരുക്കി സഞ്ചരിക്കാനുള്ള സൗകര്യം, ഭക്ഷണ പാനീയാദികളില്‍ അഭീഷ്ടങ്ങളുടെയും അഭിരുചികളുടെയും സാധൂകരണം, പാകം ചെയ്തും ചേരുവകള്‍ ചേര്‍ത്തും കഴിക്കാനുള്ള അവസരം, കൈകൊണ്ട് ആവശ്യമുള്ളിടത്ത് നിന്ന് കഴിക്കാനുള്ള സൗകര്യം, ഇതരജീവികളെ മെരുക്കി ഉപയോഗിക്കാനുള്ള യോഗ്യത, ഇതിലെല്ലാമുപരി മനുഷ്യാദരത്തിന്റെ കേന്ദ്രമായ ബുദ്ധിശേഷി തുടങ്ങിയ അനുഗ്രഹങ്ങള്‍ നല്‍കി അവന്‍ ആദരിച്ചിരിക്കുന്നു.

മനുഷ്യന് ജീവിക്കാനുതകുന്ന രീതിയില്‍ ഭൂമിയെ സംവിധാനിച്ച നാഥനെത്ര പരിശുദ്ധന്‍! ഉഷ്ണ ശ്യൈകാലങ്ങളില്‍ ഒരുപോലെ ജീവിക്കാന്‍ പറ്റുന്നു ഭൂമിയില്‍. ഇങ്ങനെ നാഥന്റെ അനിര്‍വചനീയമായ അനുഗ്രഹങ്ങള്‍ മനുഷ്യവര്‍ഗത്തിനായി ഏര്‍പ്പെടുത്തി. ഭൂമിയിലുള്ള മുഴുവനും മനുഷ്യന് വേണ്ടിയാണ് നാം സൃഷ്ടിച്ചത്.”

“അവനാണ് ഭൂമിയെ നിങ്ങള്‍ക്ക് ഒരുക്കിത്തന്നത്. അതിന്റെ മാറിടങ്ങളിലൂടെ നടന്നുകൊള്‍ക. അവന്‍ നല്‍കുന്ന ഭക്ഷണം കഴിക്കുകയും ചെയ്യുക. അവനിലേക്കാണ് മടക്കം” (മുനാഫിഖൂന്‍/7).

അല്ലാഹുവിന്റെ സൃഷ്ടിചാരുതയെപ്പറ്റി മനുഷ്യവിവേകത്തിന് ഉള്‍ക്കൊള്ളാവുന്ന പരാമര്‍ശങ്ങളാണ് ഖുര്‍ആനിലുള്ളത്. സുഖിക്കാനും ഭോഗിക്കാനും നടക്കാനുമെല്ലാം പറ്റിയ പ്രകൃതത്തില്‍ അവന്‍ നമ്മെ സൃഷ്ടിച്ചു സംവിധാനിച്ചു.

പ്രപഞ്ചം നിയന്ത്രിക്കുന്നവനെ അനുസരിക്കലാണ് ബുദ്ധി. ശാസ്ത്രജ്ഞര്‍ ഭൂമികുലുക്കത്തെക്കുറിച്ച് സൂചന നല്‍കുമ്പോഴേക്ക് മനുഷ്യന്‍ ഭയചകിതനാകുന്നു. പ്രവചിക്കാനാകാത്ത ഋതുപ്പകര്‍ച്ചകള്‍ക്കു മുന്നില്‍ പകച്ചു നില്‍ക്കാനേ മനുഷ്യന് കഴിയൂ. നിയന്ത്രണം വിട്ട് രൗദ്രഭാവം പൂണ്ട് അലറിവരുന്ന കാറ്റിന്റെ നാശം നോക്കിനില്‍ക്കാനും ഇരയാവാനുമല്ലാതെ പ്രതിരോധിക്കാന്‍ മനുഷ്യന് സാധ്യമല്ല. ജലപ്രവാഹവും തഥൈവ. അതിന്റെയൊന്നും ഗതി മനുഷ്യന് കീഴൊതുക്കാനാവാത്തതാണ്. ശക്തമായ വെള്ളെപ്പാക്കങ്ങള്‍ കൊണ്ട് അല്ലാഹു പലസമുദായത്തെയും പരീക്ഷിച്ചിട്ടുണ്ട്. പ്രളയം കൊണ്ട് മാത്രമല്ല, ജല ക്ഷാമം കൊണ്ട് പരീക്ഷിക്കാനും നാഥന് കഴിയും. മുക്കാല്‍ ഭാഗവും വെള്ളം കൊണ്ട് ചുറ്റപ്പെട്ട ഒരു തുരുത്തുപോലെയുള്ള ഭൂമിയില്‍ ജീവിക്കുന്ന മനുഷ്യന്‍ ജലക്ഷാമം അനുഭവപ്പെടുന്നത് പതിവു കാഴ്ച.

ശാരീരിക ലോകം നശ്വരവും നൈരാശ്യം നിറഞ്ഞതുമാണെന്ന് ചുരുക്കം. അതിന് ഉദാത്തമായ ഉദാഹരണമാണ് അടിക്കടിയായുണ്ടാകുന്ന ഭൂമികുലുക്കങ്ങള്‍. ഭൗമാന്തര്‍ഭാഗത്തുള്ള പാളികള്‍ പതുക്കെയാണെങ്കിലും ചലിക്കാമെന്നു ശാസ്ത്രം. ഭൂഗര്‍ഭത്തിലുണ്ടാകുന്ന മര്‍ദം മൂലം പാറയുടെ പാളികള്‍ പൊട്ടുകയും താഴേക്ക് പതിക്കുകയും ചെയ്യുന്നത് ഭൂമികുലുക്കത്തിന് കാരണമാണെന്ന് അവര്‍ പറയുന്നു. മേല്‍ വിവരണങ്ങളില്‍ നിന്ന് ഇഹലോകത്തിന്റെ നശ്വരത ബോധ്യപ്പെടുന്നുണ്ട്. ജീവിതയാത്രയില്‍ അടുത്ത കേന്ദ്രത്തിലേക്ക് നീങ്ങാന്‍ ഓരോ മനുഷ്യനും നിര്‍ബന്ധിതനാണ്.

ആത്മാവിന്റെ വാഹനമാണ് ശരീരം. ഉയര്‍ത്തെഴുന്നേല്‍പുനാളില്‍ ഇതേ വാഹനം തന്നെ വേണമെന്നില്ല. ഇമാം ഗസ്സാലി(റ) പറയുന്നു: “കുതിര മാറിയാലും സവാരിക്കാരന്‍ മുമ്പത്തെ ആള്‍ തന്നെയാണ്. ബാല്യം മുതല്‍ വാര്‍ധക്യം വരെ ശരീരത്തില്‍ മാറ്റങ്ങള്‍ സംഭവിക്കുന്നു. ആത്മാവില്‍ ഒരിക്കലും മാറ്റം സംഭവിക്കുന്നില്ല!”

ഉറ്റമിത്രത്തെ വിട്ടുപിരിയാന്‍ ശരീരം തയ്യാറാവുകയില്ല. അതിനാല്‍ മരണത്തിന്റെ മാലാഖക്ക് മനുഷ്യ ശരീരത്തില്‍ സമ്മര്‍ദം ചെലുത്തേണ്ടിവന്നേക്കാം. ഭൗതികതയുടെ ആനന്ദത്തിമിര്‍പ്പില്‍ ലയിച്ച് ശരീരത്തില്‍ നിന്ന് പുറത്തിറങ്ങാന്‍ മടിക്കുന്ന ആത്മാവിനോട് ഒരു ദയയുമില്ലാതെ പിടിച്ച് വലിച്ച് പുറത്തിടുന്ന രംഗമാണ് മരണം. അവിടെ വിശ്വാസിയുടെ ആത്മാവിന് പരിഗണന ലഭിക്കും. “പ്രശാന്തി നേടിയ ആത്മാവേ, നീ നിന്റെ നാഥന്റെ സവിധത്തിലേക്ക് പൂര്‍ണ തൃപ്തിയോടെ മടങ്ങുക. സ്വര്‍ഗത്തില്‍ പ്രവേശിക്കുക”എന്ന് മാലാഖ സൗമ്യമായി പറയും.

എന്നാല്‍ മ്ലേച്ചാത്മാവിന്റെ മരണരംഗം ഹൃദയഭേദകം. അതിനെയും വഹിച്ച് ആകാശത്തേക്ക് കയറുന്ന മാലാഖമാരോട് പോലും മറ്റുള്ളവര്‍ നീരസം പ്രകടിപ്പിക്കും. ആകാശവും ഭൂമിയും അവനെ ശപിക്കുന്നു. തന്നില്‍ നിന്ന് പറന്നകലുന്ന ആത്മാവിനെ സങ്കടത്തോടെ ശരീരം നോക്കുന്ന രംഗം പ്രവാചകര്‍ പഠിപ്പിച്ചിട്ടുണ്ട്.

“അവര്‍ക്കുപിറകില്‍ ഉയര്‍ത്തെഴുന്നേല്‍പുനാള്‍ വരെ ബര്‍സഖുണ്ട്” (22/100). മരണത്തിനും പുനരുദ്ധാരണത്തിനുമിടക്കുള്ള ഘട്ടം ആത്മാക്കള്‍ക്ക് വിസ്മൃതിയുടെ കാലമല്ല. അവയുടെ അസ്തിത്വം ശൂന്യതയില്‍ ലയിക്കുകയുമില്ല. ഉണ്മയില്ലായ്മയുടെ ഘട്ടത്തിലേക്കുള്ള സംക്രമണമല്ല മരണം. പുനര്‍ജന്മം നടക്കുന്നത് വരെ ഇല്ലിയ്യീനിലും സിജ്ജീനിലുമാണ് ആത്മാക്കള്‍ വസിക്കുന്നത്. ചലനമറ്റ് കിടക്കുന്ന ശരീരത്തെ അകലെ തന്റെ സങ്കേതത്തില്‍ വിശ്രമിക്കുന്ന ആത്മാവ് കാണുന്നു. അതുപോലെ ശരീരം ആ കിടപ്പില്‍ തന്നെ പരിസരം സാകൂതം വീക്ഷിക്കുകയും ചെയ്യുന്നു. അത് അനുഭവിക്കുന്ന സുഖദു:ഖങ്ങളിലെല്ലാം വിദൂരതയിലെ ആത്മാവ് ചേരുന്നു.

ആലമുല്‍ ബര്‍സഖില്‍ മനുഷ്യന്‍ അതിലെ അനന്തരക്രിയകളുമായി മുന്നോട്ട്പോകും. മരിച്ചവര്‍ക്ക് പ്രഭാതത്തിലും പ്രദോഷത്തിലും അവരുടെ അന്തിമ സങ്കേതം കാണിക്കപ്പെടും. “”നരകം രാവിലെയും വൈകുന്നേരവും അതില്‍ പ്രദര്‍ശിപ്പിക്കപ്പെടുന്നു” (40/46).

പരിശുദ്ധാത്മാവ് സ്വര്‍ഗത്തിന്റെ സുഗന്ധവും സൗന്ദര്യവും മ്ലേച്ഛാത്മാവ് നരകത്തിന്റെ യാതനകളും ആസ്വദിച്ചുകൊണ്ടിരിക്കുന്ന കല്ലറയില്‍ എത്രകാലം കഴിച്ചുകൂട്ടണം? ആയിരക്കണക്കിന് വര്‍ഷങ്ങള്‍ക്ക് മുമ്പ് മരിച്ചവര്‍ ഇപ്പോഴും അതില്‍ കഴിയുന്നു. അന്ത്യനാള്‍ വരെയുള്ള ഭവനം എന്ന് ഖുര്‍ആനികവചനങ്ങള്‍ ദ്യോതിപ്പിക്കുന്നു ഖബറിനെക്കുറിച്ച്. മറവ് ചെയ്യപ്പെടുന്ന ഭൗതികജഡം മണ്ണിലലിഞ്ഞ് ചേര്‍ന്ന് നശിക്കുകയാണ്. പുഴുക്കളും മറ്റും കടിച്ച് വലിച്ച് കണ്ണുകള്‍ കൊഴിഞ്ഞ് നശിക്കുന്നു. നാഥന്‍ പ്രത്യേക പരിഗണന നല്‍കിയ മഹത്തുക്കളുടേതൊഴികെ.

ഖബര്‍ ശിക്ഷയുടെ കാഠിന്യത്തെ പ്രവാചക വചനം സൂചിപ്പിക്കുന്നുണ്ട്: “”ഓരോ ഖബറും ഭീകരമായ സ്വരത്തില്‍ പ്രഖ്യാപിക്കുന്നുണ്ട്; ആദമിന്റെ മക്കളേ, നിങ്ങള്‍ എന്നെ മറന്നോ? ഏകാന്തതയുടെ ഭവനമാണുഞാന്‍. വിജനമായ ഒരു തുണ്ട് ഭൂമി. പുഴുക്കളുടെയും ചെള്ളുകളുടെയും മാളം. കാഠിന്യത്തിന്റെയും വിചാരണയുടെയും ഇടം. അല്ലാഹു എന്നെ ആര്‍ക്കുവേണ്ടി വാസയോഗ്യമാക്കുന്നുവോ, അവര്‍ക്കൊഴികെ എല്ലാവര്‍ക്കും ഞാന്‍ ശിക്ഷാകേന്ദ്രമാണ്. പ്രവാചകര്‍ ഇത്രകൂടി വ്യക്തമാക്കി, ഖബര്‍ ഒന്നുകില്‍ ഒരു നരകക്കുണ്ട്. അല്ലെങ്കില്‍ സ്വര്‍ഗത്തില്‍ നിന്നുള്ള ഒരു ആരാമം!” (ത്വബ്റാനി).

ഇസ്സുദ്ദീന്‍ പൂക്കോട്ടുചോല

ഖാദിയാനി:ഖാതമുന്നബിയ്യീനി”ലെ വക്രവിചാരങ്ങള്‍

“ഖാതമുന്നബിയ്യീനി”ലെ വക്രവിചാരങ്ങള്‍● 0 COMMENTS🍔🍿🍔🍿🍔🍿
അഹ്ലുസ്സുന്നയുടെ ആദർശ പഠനത്തിന്  ഇസ്ലാമിക് ഗ്ലോബൽ വോയ്സ് ബ്ലോഗ്    ഉപയോഗപ്പെടുത്തുക

https://islamicglobalvoice.blogspot.in/?m=0

ഖുര്‍ആന്‍, ഹദീസ്, ഇജ്മാഅ് എന്നീ പ്രമാണങ്ങളില്‍ നിന്ന് തിരുദൂതര്‍(സ്വ)യുടെ അന്ത്യപ്രവാചകത്വം വിശദീകരിക്കുകയാണ് ഇതുവരെ ചെയ്തത്. ഇനി, ഇതു സംബന്ധിയായി ഖാദിയാനികള്‍ ഉന്നയിക്കുന്ന വികല ന്യായങ്ങളും പ്രവാചകത്വ തുടര്‍ച്ച സമര്‍ത്ഥിക്കാന്‍ അവര്‍ വളച്ചൊടിക്കുന്ന പ്രമാണഭാഗങ്ങളും ഹ്രസ്വമായി വിലയിരുത്താം. നബി(സ്വ) അന്ത്യപ്രവാചകനാണെന്ന് വ്യക്തമായി തെളിയിക്കുന്ന സൂറത്തുല്‍ അഹ്സാബിലെ 40ാം സൂക്തം തന്നെ അതിനു പൂര്‍വാപര വിരുദ്ധമായ പ്രവാചകത്വ തുടര്‍ച്ചാ വാദത്തിനും തെളിവായെഴുന്നള്ളിക്കാന്‍ മാത്രം ദുര്‍വ്യാഖ്യാന വീരന്മാരാണ് മീര്‍സായികള്‍! പൊട്ടും പൊടിയും തപ്പിയെടുത്ത് സ്ഥിര പ്രതിഷ്ഠിതമായൊരു തത്ത്വത്തെ അപഹസിക്കാന്‍ ഇവരെക്കാള്‍ മിടുക്കുള്ള ഒരു മതവിഭാഗം ലോകത്ത് കാണില്ല. അത്രയേറെ പ്രാവീണ്യം ഈ രംഗത്ത് ഖാദിയാനികള്‍ പ്രകടിപ്പിക്കുന്നത് കാണാം. ഈ ധ്യൈമുള്ളതുകൊണ്ടാണ് 33/40 അടക്കം പത്തിലധികം ആയത്തുകള്‍ നബിയാഗമനത്തിന് തെളിവായി ന്യായീകരിക്കാന്‍ അവര്‍ക്കാവുന്നത്. അവയെക്കുറിച്ചുള്ള വസ്തുതാപരമായ പഠനത്തിന് മുമ്പ് നാം മനസ്സിലാക്കേണ്ട യാഥാര്‍ത്ഥ്യം മീര്‍സക്കായുള്ള തിരക്കഥയൊരുക്കല്‍ മാത്രമാണ് ഈ എഴുന്നള്ളിപ്പുകളൊക്കെയെന്നതാണ്. അല്ലെങ്കില്‍ അവരുടെ വാദപ്രകാരം തിരുനബി(സ്വ)ക്കു ശേഷം ഒരാള്‍ നബിയാവുമെന്നതിന് ഇത്രമേല്‍ തെളിവുകള്‍(?) ഉണ്ടായിട്ടും, പ്രവാചകത്വ ലബ്ധിക്ക് അവര്‍ കൊട്ടിപ്പാടുന്ന ഗുണവിശേഷണങ്ങളൊക്കെയുണ്ടായിട്ടും, നബിമാരുടെ തുടര്‍വരവ് അംഗീകരിച്ചില്ലെങ്കില്‍ അല്ലാഹുവിന്റെ ഏറ്റവും വലിയ നിഅ്മത്തിന് ലോപം വരുമെന്ന വാദം ഖാദിയാനികള്‍ വ്യാപകമായി പ്രചരിപ്പിച്ചിട്ടും തിരുദൂതര്‍ (സ്വ)ക്ക് ശേഷം നീണ്ട ആയിരത്തി ഇരുനൂറിലധികം വര്‍ഷം ഒരാളെയും നബിയായി അംഗീകരിക്കാതിരിക്കുന്നതെന്തുകൊണ്ടാണ്? അതിലേറെ അതിശയം, മീര്‍സക്കു ശേഷം നബി വാദവുമായി വന്ന തന്റെ സന്തത സഹചാരികളായ അനുയായികളെപ്പോലും ഔദ്യോഗിക ഖാദിയാനികള്‍ നബിയായി സ്വീകരിക്കാതിരിക്കുന്നതാണ്. സമീപകാലത്ത് നബിയെന്നു പറഞ്ഞ് പ്രത്യക്ഷപ്പെട്ട ഇപ്പോഴും ജീവിച്ചിരിക്കുന്ന ആഫ്രിക്കക്കാരന്‍ ഖാദിയാനിയെയും ഇവര്‍ നബിയായി പരിഗണിക്കുന്നില്ല! തിരുദൂതര്‍ക്കു ശേഷം നബി വരുമെന്നതിന് തെളിവുകളുണ്ടെങ്കില്‍ എന്തുകൊണ്ട് അത് മീര്‍സാഗുലാമില്‍ മാത്രമായി ഖാദിയാനികള്‍ പരിമിതപ്പെടുത്തണം?

“ഖാതമുന്നബിയ്യീന്‍”പ്രയോഗത്തിന് അവസാനത്തെ പ്രവാചകന്‍ എന്ന അര്‍ത്ഥം വിവിധ രീതികളില്‍ മുമ്പ് വിശദീകരിക്കുകയുണ്ടായി. മത മഹാജ്ഞാനികള്‍ മുതല്‍ ഭാഷാ പണ്ഡിതര്‍ വരെയും അത് തെളിയിച്ചിട്ടുണ്ട്. കെട്ടിട നിര്‍മാണത്തിന്റെ ഉദാഹരണം നിരത്തിയും മറ്റനവധി വാക്യങ്ങളില്‍ വ്യക്തമാക്കിപ്പറഞ്ഞും നബി(സ്വ) തന്നെ പഠിപ്പിച്ചതാണിക്കാര്യം. എന്നാല്‍, ഈ വസ്തുതക്കു നേരെ കണ്ണ് ഇറുക്കിയടച്ച് “ഖാതമുന്നബിയ്യീന്‍”ശ്രേഷ്ഠ പ്രവാചകന്‍ എന്ന വിധം ദുര്‍വ്യാഖ്യാനിക്കുകയാണ് മീര്‍സായികളിലെ ന്യായീകരണ വിദഗ്ധര്‍. മുസ്ലിം പൊതുസമൂഹം ഇന്നോളം തുടര്‍ച്ച മുറിയാതെ വിശ്വസിച്ചുവരുന്ന ആശയം അവര്‍ക്ക് സ്വീകാര്യമല്ല. ഇങ്ങനെയുള്ള മതവിരുദ്ധ വ്യതിയാനം എന്തെങ്കിലും പ്രമാണങ്ങള്‍ പേരിനെങ്കിലും വിലയിരുത്തിയല്ലെന്നും കേവല വലിച്ചുനീട്ടല്‍ മാത്രമാണെന്നതുമാണ് ഏറെ സഹതാപമര്‍ഹിക്കുന്നത്. മീര്‍സാ ബശീര്‍ അഹ്മദ് എഴുതുന്നു: ഈ വചനത്തില്‍ പ്രയോഗിച്ചിരിക്കുന്ന ഖാതമുന്നബിയ്യീന്‍ എന്നത് കൊണ്ടുദ്ദേശിക്കുന്നത് തിരുമേനിയുടെ ആഗമനത്തോടെ നുബുവ്വത്തിന്റെ ശൃംഖല അവസാനിച്ചുപോയിരിക്കുന്നുവെന്നും തിരുമേനി എല്ലാ വിധത്തിലും അവസാനത്തെ നബി ആണെന്നുമാണ് ഞങ്ങളുടെ എതിരാളികള്‍ പറയുന്നത്. എന്നാല്‍ ഞങ്ങളുടെ പക്കല്‍ ഈ അര്‍ത്ഥം ശരിയല്ല. (സന്മാര്‍ഗ ദര്‍ശിനി, പു. 310) എന്തുകൊണ്ട് ശരിയല്ല? ഒരു കഷ്ണം പ്രമാണം പോലും ഖാദിയാനി അതിന് ഉദ്ധരിക്കുന്നില്ല. പിന്നെയോ, വെറും പിടിവാശി മാത്രം!

ഖാതമുന്നബിയ്യീനിന്റെ ആശയം മുസ്ലിംകള്‍ പറയുന്നതോ അതോ ഖാദിയാനികള്‍ ഉന്നയിക്കുന്നതോ എന്ന് ഈ പരമ്പരയുടെ രണ്ടാം ലേഖനത്തില്‍ വിശദീകരിച്ചെഴുതിയത് ഒന്നുകൂടി വായിക്കുക. മീര്‍സക്ക് മുമ്പ് ജീവിച്ചുമരിച്ച പണ്ഡിതരില്‍ ഒരാള്‍ക്കു പോലും അവസാനത്തെ നബി എന്നല്ലാതെ ഇതിന് മറ്റൊരു വിശദീകരണം നല്‍കാനില്ലായിരുന്നു. സ്വഹാബികള്‍, താബിഉകള്‍, അവരെ പിന്തുടര്‍ന്നവര്‍ എന്നിങ്ങനെ പരമ്പരയായി വിശുദ്ധ മതം കൈമാറിത്തന്ന സാത്വിക ശൃംഖലയിലെ ഒരു കണ്ണി പോലും അന്ത്യപ്രവാചകന്‍, ശേഷം ഒരു വിധ നബിയും നിയോഗിതനാവാത്തയാള്‍എന്ന വിധമല്ലാതെ ഇതിനര്‍ത്ഥം പഠിപ്പിച്ചുതന്നിട്ടില്ല. ഖുര്‍ആനും മതനിയമങ്ങളും നമുക്ക് പഠിപ്പിച്ചുതന്ന ഇവര്‍ക്കാര്‍ക്കുമറിയാത്ത ഒരു സാരം ഈ വാദത്തിന് ഉണ്ടാക്കിയെടുക്കാന്‍ എന്തുകൊണ്ട് മീര്‍സായികള്‍ നിര്‍ബന്ധിതരാവുന്നുവെന്നത് വിശദീകരിക്കേണ്ടതില്ലല്ലോ, എങ്ങനെയെങ്കിലും മീര്‍സാഗുലാം അഹ്മദിനെ നബിയായി ഒരുക്കിയെടുക്കാനുള്ള സാഹസം തന്നെയാണിത്.

“ഖാതമുന്നബിയ്യീനി”ന്റെ ആശയ ചോരണത്തിന് മീര്‍സായികള്‍ വിവിധ ഗ്രന്ഥങ്ങളില്‍ ഉന്നയിക്കുന്ന പ്രധാന ന്യായങ്ങള്‍ ഇനി വിലയിരുത്താം.

ഒന്ന്: ഖാതം എന്നതിനെ “അന്നബിയ്യീന്‍”എന്ന പുരുഷ ബഹുവചന വിശേഷണത്തിലേക്ക് സമാസപ്പെടുത്തി (ഇളാഫത്ത്) പ്രയോഗിച്ചാല്‍ അതിനു ശ്രേഷ്ഠന്‍ എന്നതല്ലാതെ അന്ത്യന്‍ എന്ന അര്‍ത്ഥമേ ലഭിക്കില്ല. അറബി ഭാഷയിലെ ഒരു പ്രയോഗം കൊണ്ടും അത് തെളിയിക്കാനുമാവില്ല.”“

ഇത് ഖാദിയാനികള്‍ക്ക് മാത്രമറിയുന്ന ഒരു ഊഹമാണ്; ഇങ്ങനെയൊരു ഭാഷാ നിയമം അത് സംബന്ധമായ ഗ്രന്ഥങ്ങളിലൊന്നും പരാമര്‍ശിക്കപ്പെട്ടിട്ടില്ലെന്നു തന്നെയല്ല അറബി ഭാഷയുടെ ആധികാരിക ഇമാമുകള്‍ക്ക് പൂര്‍ണമായും വിരുദ്ധവുമാണ്. ചില ഉദ്ധരണങ്ങള്‍ പരിശോധിക്കാം. “ലിസാനുല്‍ അറബ്”എഴുതുന്നു: “ഖിതാമുല്‍ ഖൗമി, ഖാതിം, ഖാതം എന്നാല്‍ സമൂഹത്തില്‍ അവസാനത്തെയാള്‍. മുഹമ്മദ്(സ്വ) ഖാതമുല്‍ അമ്പിയാഅ് (അവസാന നബി) ആയതുപോലെ. ഖാതിം, ഖാതം എന്നിവ നബി(സ്വ)യുടെ നാമങ്ങളാണ്. ഖുര്‍ആനില്‍ അവിടുന്ന് “ഖാതമുന്നബിയ്യീന്‍”ആണെന്നു പറഞ്ഞിട്ടുണ്ടല്ലോ. നബി(സ്വ) അവസാനത്തെ പ്രവാചകനാകുന്നു എന്നര്‍ത്ഥം”“ (12/163) ഖാതം, ഖാതിം അവസാനത്തേത് എന്ന നേര്‍ക്കുനേര്‍ അര്‍ത്ഥം വിശദീകരിച്ചതിനു ശേഷം അതിന് തെളിവായി ഉദ്ധൃത ശൈലീ നിഘണ്ടു ഉന്നയിക്കുന്നത് ഖാതമുന്നബിയ്യീന്‍ എന്ന ഖുര്‍ആന്‍ വാക്യമാണ്. ജംഹറതുല്ലുഗ (1/184) അല്‍ മുഹക്കം (5/156) പോലുള്ള മറ്റു ഗ്രന്ഥങ്ങളിലും ഇതേ പ്രകാരമുള്ള സമര്‍ത്ഥനം കാണാം. ഭാഷാ ഗ്രന്ഥങ്ങള്‍ നിര്‍മിച്ചവരാരും “ഖാദിയാനി ഊഹം”അംഗീകരിക്കുന്നില്ലെന്നതിന്റെ വ്യക്തമായ പ്രമാണമാണിത്. ഒരാള്‍ പോലും ഒരു അംഗീകൃത കൃതിയിലും “ഖാതമുന്നബിയ്യീന്‍”എന്നാല്‍ ശ്രേഷ്ഠനായ പ്രവാചകന്‍ എന്ന് പഠിപ്പിക്കുന്നുമില്ല. വായക്ക് തോന്നിയത് കോതക്കു മാത്രമല്ല, ഖാദിയാനികള്‍ക്കും പാട്ട് എന്നല്ലാതെന്ത്?

രണ്ട്: അവര്‍ പറയുന്നു: നബി(സ്വ)യുടെ ഖാതമുന്നുബുവ്വത്ത് ഞങ്ങള്‍ നിഷേധിക്കുന്നില്ല. എന്നാല്‍, അതിനര്‍ത്ഥം അവിടുന്ന് അന്ത്യറസൂല്‍ ആണെന്നല്ല. മറിച്ച് നബിമാരുടെ മുദ്രയെന്നാണ്. അഥവാ, നബി(സ്വ)യുടെ അംഗീകാരമില്ലാതെ ഇനിയൊരു നബിയും വരില്ല. നബിയുടെ അംഗീകാരമുണ്ടെങ്കില്‍ വേറെയും നബിമാര്‍ വരും. മീര്‍സ ഇപ്രകാരമാണ് (പ്രവാചകത്വം ഖുര്‍ആനില്‍ പു. 13,14)

ഖാദിയാനികളുടെ മറ്റൊരു തമാശ! ഇങ്ങനെയൊരു കാര്യം ഖുര്‍ആന്‍ പറഞ്ഞോ? റസൂല്‍(സ്വ) പഠിപ്പിച്ചോ? വേണ്ട, ഏതെങ്കിലുമൊരു പണ്ഡിതന്‍ ഓര്‍മപ്പെടുത്തിയോ? ഇതൊന്നുമില്ലാതെ മീര്‍സയെ നബിയാക്കി ചമയിച്ചൊരുക്കാന്‍ അങ്ങനെയൊന്ന് പറഞ്ഞുനോക്കുക തന്നെ. വിശ്വാസികളെ സംബന്ധിച്ചിടത്തോളം ഏറെ പ്രാധാന്യമുള്ള പ്രവാചകത്വ കാര്യത്തില്‍, അതും നബി(സ്വ)യുമായി നേരിട്ടു ബന്ധപ്പെട്ട ഒരു വിഷയത്തില്‍ അവിടുന്ന് നബിമാരെ സുലഭമായി സീല് വെച്ചുവിടുമെങ്കില്‍ തന്റെ വിവിധ പ്രത്യേകതകള്‍ വിശദമായി തന്നെ ധാരാളം ഹദീസുകളില്‍ പഠിപ്പിച്ചുതന്ന റസൂല്‍(സ്വ) എന്തുകൊണ്ട് ഇതേക്കുറിച്ച് ഒരു സൂചന പോലും നല്‍കിയില്ല എന്ന് നിഷ്പക്ഷ മനസ്സോടെ മീര്‍സായികള്‍ ആലോചിക്കുക. ഇക്കാര്യം ഇസ്ലാമിക പ്രമാണങ്ങളില്‍ നിന്ന് എങ്ങനെ ലഭിച്ചുവെന്നു വ്യക്തമാക്കാനുള്ള നീതിബോധമെങ്കിലും അവര്‍ക്കുണ്ടാവേണ്ടതുണ്ട്. പുറമെ, ഈയൊരു കാര്യം വാദത്തിനായി തല്‍ക്കാലം അംഗീകരിച്ചുകൊടുക്കുക. എന്നാലും ഇതെന്തുകൊണ്ട് മീര്‍സയില്‍ പരിമിതപ്പെടണം? മറ്റാര്‍ക്കും ഇത്തരമൊരു മുദ്ര ലഭിക്കില്ലേ? മീര്‍സ തന്നെക്കുറിച്ച് അന്ത്യപ്രവാചകന്‍ എന്ന് പഠിപ്പിച്ചത് (തദ്കിറതുശ്ശഹാദതൈന്‍/35) ഈ മുദ്ര കുത്തലിന് വിരുദ്ധമാവില്ലേ? മീര്‍സക്കു തന്നെ നബിയില്‍ നിന്നു ലഭിച്ച സീലടയാളം അദ്ദേഹം വെളിപ്പെടുത്തിയിരുന്നോ? പോഴത്തത്തിന് സംഘരൂപം വന്നാല്‍ അത് ഖാദിയാനിസമായാണല്ലോ മാറുക.

മൂന്ന്: അഹ്സാബ് 40ാം സൂക്തം വളച്ചൊടിക്കുന്നതിനുവേണ്ടി മീര്‍സായികള്‍ ഉന്നയിക്കുന്ന ഒരു നീട്ടിപ്പരത്തല്‍ കൂടി ഉദ്ധരിക്കാം. മീര്‍സാ ബശീറുദ്ദീന്‍ എഴുതുന്നു: “”…ഖാതമുന്നബിയ്യീന്‍ എന്നതിനു അവസാനത്തെ നബിയെന്ന് അര്‍ത്ഥമെടുക്കുകയാണെങ്കില്‍ പ്രസ്തുത ആയത്തിന് യാതൊരു അര്‍ത്ഥവുമില്ലാതെയായിത്തീരും. ഈ നിലയില്‍ ആയത്തിന്റെ അര്‍ത്ഥം മുഹമ്മദ് നബിക്ക് പുത്രസന്താനമില്ലെന്നതു ശരിതന്നെ. എന്നാല്‍ അദ്ദേഹം അവസാനത്തെ നബിയാണ് എന്നായിത്തീരും. ഇത് അര്‍ത്ഥ രഹിതമായൊരു വാക്യമാണ്. “ലാകിന്‍”എന്ന പദം മുമ്പില്‍ പറഞ്ഞ സംഗതിക്കെതിരായ ആശയം പിന്നീട് പ്രകടിപ്പിക്കുന്നതിനോ മുന്പുള്ളതിലുള്ള സംശയം നീക്കേണ്ടതിനോ ആണ് ഉപയോഗിക്കുക. ഈ വ്യാഖ്യാനത്തിന് ശേഷം ചിന്തിച്ചാല്‍ ഖാദിയാനികള്‍ പറയുന്നതല്ലാത്ത അര്‍ത്ഥം ബുദ്ധിപൂര്‍വകമല്ലെന്ന് ബോധ്യപ്പെടും. ഞങ്ങള്‍ പറയുന്ന അര്‍ത്ഥം ഇതാണ്. മുഹമ്മദ് നബിക്ക് ശാരീരികമായ സന്താനങ്ങള്‍ ഇല്ല; പക്ഷേ അദ്ദേഹത്തിന് ആത്മീയ സന്താനങ്ങള്‍ ധാരാളമുണ്ട്. എന്നു മാത്രമല്ല, അദ്ദേഹത്തിന്റെ ആത്മീയ സന്താനങ്ങളില്‍ നബിയും റസൂലും കൂടി ഉണ്ടാവാം. (സന്മാര്‍ഗദര്‍ശിനി. പുറം 312, 313 സംഗ്രഹം) മുമ്പ് പറഞ്ഞതുപോലെ, ഇങ്ങനെയാണ്, അങ്ങനെയാണ്, അതുകൊണ്ട് ഇതിങ്ങനെ വരേണ്ടതാണ് എന്ന് തീരുമാനിച്ചു പ്രഖ്യാപിക്കുകയാണ് മീര്‍സായികള്‍. ചെറിയ കുട്ടികള്‍ മണ്ണ് ഉപയോഗിച്ച് അടുക്കള വിഭവങ്ങള്‍ തയ്യാറാക്കുന്നതിന് സമം. ചോറും കറിയും പായസവുമൊക്കെയും മണ്ണുതന്നെ. പക്ഷേ, ഓരോന്നിന്റെയും പരിഗണനയും പേരുകളും മാറിയിരിക്കും!

നബി(സ്വ)യുടെ ദത്തുപുത്രനായ സൈദ്(റ) ഭാര്യ സൈനബ്(റ)യെ ത്വലാഖ് ചൊല്ലിയപ്പോള്‍ ദത്തുപുത്രനെ സ്വ പുത്രനെപ്പോലെ എല്ലാ അര്‍ത്ഥത്തിലും കണക്കാക്കിയിരുന്ന നിയമം പ്രയോഗതലത്തില്‍ തന്നെ തുടച്ചുനീക്കാനായി നബി(സ്വ) അല്ലാഹുവിന്റെ നിര്‍ദേശപ്രകാരം അവരെ വിവാഹം കഴിച്ച പശ്ചാതലത്തിലാണ് മേല്‍ സൂക്തം അവതരിക്കുന്നത്. അന്ത്യപ്രവാചകന്‍ എന്ന് ഖാതമുന്നബിയ്യീന് അര്‍ത്ഥം വരുമ്പോഴേക്ക് മീര്‍സായികള്‍ ഊഹിച്ചെടുക്കുന്ന “മഹാപ്രശ്നങ്ങള്‍”സംഭവിക്കുമോ? “ലാകിന്‍”പദത്തിന്റെ മുമ്പില്‍ പറഞ്ഞ വാക്യങ്ങളുടെ ആശയപ്പൊരുത്തം എന്താണ്? ഇമാം റാസി(റ)യെ വായിക്കാം: നബി(സ്വ) ഒരു പുരുഷ സന്താനത്തിന്റെയും പിതാവല്ലെന്ന നിഷേധത്തിനുടന്‍ അവിടുന്ന് വേറൊരര്‍ത്ഥത്തില്‍ പിതാവാണെന്ന് അല്ലാഹു പ്രഖ്യാപിക്കുന്നു. അതായത്, അവിടുന്ന് അനുയായികളോടു കാണിക്കുന്ന അനുകമ്പയും അവര്‍ തിരിച്ചു നല്‍കേണ്ട ആദരവും പരിഗണിച്ചാല്‍ നബി(സ്വ) പിതാവിനെപ്പോലെയാണ്, എന്നല്ല വിശ്വാസികള്‍ക്ക് തിരുദൂതര്‍ സ്വന്തത്തെക്കാള്‍ ബന്ധപ്പെട്ടിരിക്കുകയാണ്. ശാരീരിക പിതാവിനോട് ഈ വിധം കടപ്പാടില്ലല്ലോ. ശേഷം, അവിടുത്തെ ഏറെ വര്‍ധിച്ച അനുകമ്പയുടെയും ആര്‍ദ്രതയുടെയും രീതി വിവരിക്കുകയാണ് ഖാതമുന്നബിയ്യീന്‍ എന്ന പദത്തില്‍. എന്തുകൊണ്ടെന്നാല്‍, നബിയുടെ ശേഷം മറ്റൊരു നബി വരാനിരിക്കുന്നുവെങ്കില്‍ നബി(സ്വ) വല്ല വിധി തീരുമാനങ്ങളും ഉപദേശവും ഉപേക്ഷിച്ചു പോയാലും പിന്നീട് വരാനുള്ളയാള്‍ അത് നടപ്പിലാക്കിക്കൊള്ളും. എന്നാല്‍, അന്ത്യ പ്രവാചകനായിരിക്കുന്ന നബി(സ്വ) മറ്റൊരാള്‍ സംരക്ഷണത്തിനില്ലാത്ത കുട്ടിയോട് പിതാവിനുണ്ടാകുന്നതുപ്രകാരം സമൂഹത്തോട് ഏറെ താത്പര്യവും സ്നേഹബന്ധവും പുലര്‍ത്തുക തന്നെ ചെയ്യും. സൂക്തത്തിന്റെ അവസാനം പറയുന്ന “”അല്ലാഹുവിന് എല്ലാ കാര്യങ്ങളും ദൃഢമായറിയാം”“എന്ന ഭാഗം ഇത് പൂര്‍ണമായി തെളിയിക്കുന്നു. എന്നുവെച്ചാല്‍, മുഹമ്മദ്(സ്വ)ക്ക് ശേഷം ഒരു നബിയും വരാനില്ലെന്ന് ശരിക്കറിയാവുന്ന അല്ലാഹു അവിടുന്ന് തന്നെ ശരീഅത്ത് പൂര്‍ത്തിയാക്കണമെന്ന് തീരുമാനിച്ചതാണ്. അങ്ങനെയാണ് ദത്തുപുത്രന്‍ സ്വപുത്രനു തുല്യനാണെന്ന കാലങ്ങളായി സമൂഹമനസ്സില്‍ ദൃഢപ്രതിഷ്ഠ നേടിയ സംഗതി നബി(സ്വ) തന്നെ തിരുത്തിക്കൊടുക്കണമെന്ന് അവന്‍ നിശ്ചയിച്ചത്. ഇത് മതത്തിന്റെ പൂര്‍ത്തീകരണത്തിനായിരുന്നു. നബി(സ്വ) ഈ നിയമം പ്രഖ്യാപിച്ചാല്‍ പോലും അത് ശരീഅത്തായിത്തീരുമെങ്കിലും നബി(സ്വ) തന്നെ പ്രായോഗികമായി തിരുത്തിക്കാണിക്കുന്നില്ലെങ്കില്‍ ചിലര്‍ക്കെങ്കിലും ദത്തുപുത്രനെ സ്വപുത്രനെപ്പോലെ പരിഗണിക്കാതിരിക്കുന്നതില്‍ മാനസിക പ്രയാസങ്ങളുണ്ടായേക്കും. ഉടുമ്പ് മാംസം നബി(സ്വ) ഭക്ഷിക്കാതിരുന്നതിനാല്‍ പലര്‍ക്കും അതിനോട് അനിഷ്ഠമുണ്ടായി, അനുവദനീയമായിട്ട് പോലും. എന്നാല്‍ പല മതങ്ങളിലും ഒട്ടക മാംസം നിഷിദ്ധമായിട്ടും നബി(സ്വ) ഭക്ഷിച്ച കാരണത്താല്‍ എല്ലാവര്‍ക്കും ഏറെ താത്പര്യം അത് കഴിക്കുന്നതിന് ജനിച്ചു. സൈനബി(റ)നെ അവിടുന്ന് വിവാഹം കഴിക്കണമെന്ന ദൈവ കല്‍പ്പന ഇതിനായിട്ടാണ്… (തഫ്സീറുല്‍ കബീര്‍ 33/40 വ്യാഖ്യാനം) മീര്‍സായികളുടെ ദുര്‍ന്യായം ചീട്ടുകൊട്ടാരം പോലെ ചിതറുന്നത് മനസ്സിലായില്ലേ. “ലാകിന്‍”അതിന്റെ എല്ലാ രീതിയിലും പൂര്‍ണത നേടുന്നത് “ഖാതമുന്നബിയ്യീന്‍”എന്നതിന് “അന്ത്യപ്രവാചകന്‍”എന്ന അര്‍ത്ഥം വരുമ്പോഴാണെന്ന് ഇതില്‍ നിന്നും വ്യക്തം. അല്ലെങ്കിലും മീര്‍സായികള്‍ പറയുന്നതു പ്രകാരം “”എന്നല്ല, നബിയുടെ ആത്മീയ സന്താനങ്ങളില്‍ നബിമാരും റസൂലുമാരും വരെയുണ്ടാവും”“എന്ന ആശയം “വഖാതമുന്നബിയ്യീന്‍”എന്നതിന് ഏത് ഭാഷാ നിയമപ്രകാരമാണ് കല്‍പ്പിക്കാനാവുക. ഇങ്ങനെ തെളിവില്ലാത്ത പലവിധ അബദ്ധ ന്യായങ്ങള്‍ കൊണ്ട് ലോകം അംഗീകരിച്ച ഒരു മഹാ സത്യത്തെ കുഴിച്ചുമൂടാനുള്ള വൃഥാ ശ്രമത്തിലാണ് മീര്‍സായികള്‍. തല്ലരുതമ്മാവാ, ഞാന്‍ നന്നാവില്ലെന്ന പഴയ വികൃതിക്കുട്ടിയുടെ ശൈലിയില്‍…

(തുടരും)

ഖാദിയാനിസം 5/ഇബ്റാഹിം സഖാഫി പുഴക്കാട്ടിരി

ഇകെ ഹസന്‍ മുസ്ലിയാര്‍ (ന:മ): ആദര്‍ശ ഗര്‍ജ്ജനത്തിന്റെ ജ്വലിക്കുന്ന ഓര്‍മ●

 ഇകെ ഹസന്‍ മുസ്ലിയാര്‍ (ന:മ): ആദര്‍ശ ഗര്‍ജ്ജനത്തിന്റെ ജ്വലിക്കുന്ന ഓര്‍മ● 0 COMMENTS🍔🍿🍔🍿🍔🍿
അഹ്ലുസ്സുന്നയുടെ ആദർശ പഠനത്തിന്  ഇസ്ലാമിക് ഗ്ലോബൽ വോയ്സ് ബ്ലോഗ്    ഉപയോഗപ്പെടുത്തുക

https://islamicglobalvoice.blogspot.in/?m=0


പാരമ്പര്യ ഇസ്ലാമിനെ പിഴുതെറിയാന്‍ ഇറങ്ങിപ്പുറപ്പെട്ട മത നവീകരണ വാദികള്‍ക്ക് മുന്നില്‍ ആദര്‍ശ ഗര്‍ജ്ജനത്തിന്റെ ഇടിമുഴക്കമായിരുന്നു മര്‍ഹും ഇ.കെ.ഹസ്സന്‍ മുസ്ലിയാര്‍ (ന:മ). മരിക്കാത്ത ആ ഓര്‍മകള്‍ക്ക് മുപ്പത്തിമൂന്ന് സംവത്സരങ്ങള്‍ക്കിപ്പുറവും മരണമില്ല. ആദര്‍ശ പ്രസ്ഥാനത്തിന്റെ പ്രചാരണ രംഗത്ത് കരുത്തിന്റെ പ്രതീകമായി നാലു ദശകങ്ങളോളം പ്രബുദ്ധ കേരളത്തിന്റെ ശ്രദ്ധ പിടിച്ചുപറ്റിയ ആ നാമം സംവത്സരങ്ങള്‍ക്കിപ്പുറവും അതീവ രോമാഞ്ചത്തോടെയാണ് സുന്നി സമൂഹം ശ്രവിക്കുന്നത്.

മികച്ച പണ്ഡിതന്‍, എഴുത്തുകാരന്‍, പ്രസംഗകന്‍, സംഘാടകന്‍, ഗ്രന്ഥകാരന്‍, വിമര്‍ശകന്‍ എന്നീ നിലകളിലെല്ലാം വ്യക്തി മുദ്ര പതിപ്പിച്ച ഹസന്‍ മുസ്ലിയാരുടെ പ്രധാന സേവനം ഖണ്ഡന പ്രസംഗമാണ്. പുത്തന്‍വാദികളുടെ കോട്ടകൊത്തളങ്ങളെ നിലംപരിശാക്കുന്നതില്‍ അദ്ദേഹത്തിന്റെ ഖണ്ഡനപ്രസംഗങ്ങളും വാദപ്രതിവാദങ്ങളും വഹിച്ച പങ്ക് നിസ്തുലമാണ്. ചേകനൂര്‍ മൗലവി ഒരു കാലത്ത് യുക്തിവാദവുമായി കവലകള്‍ തോറും പ്രസംഗിച്ചു നടന്നപ്പോള്‍ ചെറുവാടിയില്‍ വെച്ച് അദ്ദേഹത്തെ തറപറ്റിച്ചത് ഹസന്‍ മുസ്ലിയാരായിരുന്നു. നിസ്കാരം മൂന്നു വഖ്ത്താണെന്ന് ചേകനൂര്‍ മൗലവി ഖുര്‍ആന്‍ കൊണ്ട് വാദിച്ചു. പ്രസ്തുത വാദത്തെ അതേ സൂക്തം കൊണ്ടാണ് ഹസന്‍ മുസ്ലിയാര്‍ പരാജയപ്പെടുത്തിയത്. മുളച്ചു പൊന്തുന്ന വസ്തുക്കള്‍ക്ക് മുഴുവന്‍ സകാത്ത് കൊടുക്കണമെന്ന് ചേകനൂര്‍ വാദിച്ചു. എങ്കില്‍ താടിക്ക് സകാത്തുണ്ടോ എന്ന ഉസ്താദിന്റെ ചോദ്യം മൗലവിയെ കുഴക്കി. ഉത്തരം മുട്ടിയ മൗലവി പ്രതികരിച്ചത്, “അതുകൊണ്ടാണ് ഞാന്‍ താടി വടിക്കുന്നത്”എന്നായിരുന്നു. അതോടെ മൗലവിയുടെ തനിനിറം സദസ്സിന് വീണ്ടും ബോധ്യമായി.

വെള്ളിയഞ്ചേരിയില്‍ വെച്ച് നടന്ന വാദ പ്രതിവാദത്തില്‍ ഖുതുബ പരിഭാഷ പാടില്ലെന്ന് സമര്‍ത്ഥിച്ച് മുജാഹിദ് നേതാവായ അലവി മൗലവിയെ ഹസന്‍ മുസ്ലിയാര്‍ പരാജയം സമ്മതിപ്പിച്ച സംഭവം പ്രസിദ്ധമാണ്. എടത്തറ, കൂരിക്കുഴി, വാരാണക്കര, താനാളൂര്‍, അലനല്ലൂര്‍, കൊടിയത്തൂര്‍, വാഴക്കാട്, നന്തി, കുറ്റിച്ചിറ തുടങ്ങിയ സ്ഥലങ്ങളിലെല്ലാം അദ്ദേഹം എതിരാളികളെ നേരിടുകയും അവര്‍പോലും സമ്മതിക്കുന്ന തെളിവുകള്‍ നിരത്തി പരാജയപ്പെടുത്തുകയും ചെയ്തു. വാദപ്രതിവാദം നടത്താന്‍ ഹസന്‍ മുസ്ലിയാര്‍ ആരെയും കാത്തിരിക്കാറില്ലായിരുന്നു. എവിടെയെങ്കിലും മുജാഹിദുകാരോ മറ്റു ബിദഈ കക്ഷികളോ പ്രസംഗിച്ചു എന്ന വിഷയം വെച്ച് ഒരു പോസ്റ്റ് കാര്‍ഡ് എഴുതിയാല്‍ മതി. ഹസന്‍ മുസ്ലിയാര്‍, സമയത്തിന് അവിടെ എത്തിയിരിക്കും. പിന്നെ ഉമര്‍(റ)നെ കണ്ട പിശാചിന്റെ ഗതിയായിരിക്കും എതിരാളികള്‍ക്ക്.

സൂഫിവര്യനും പണ്ഡിതനുമായ കോയട്ടി മുസ്ലിയാരുടെ ആറാമത്തെ പുത്രനായി കോഴിക്കോട് ജില്ലയിലെ പറമ്പില്‍ കടവ് എഴുത്തച്ഛന്‍ കണ്ടി വീട്ടില്‍ ഹിജ്റ 1347ലാണ് ഹസന്‍ മുസ്ലിയാര്‍ ജനിക്കുന്നത്. പറമ്പില്‍ കടവ് അടിയോട്ടില്‍ അബൂബക്കര്‍ മുസ്ലിയാരുടെ മകള്‍ ഫാത്വിമയാണ് മാതാവ്. മര്‍ഹും ഇകെ അബൂബക്കര്‍ മുസ്ലിയാരും പണ്ഡിതനും സൂഫിവര്യനുമായ മര്‍ഹും ഇകെ ഉമര്‍ ഹാജിയും ജ്യേഷ്ഠ സഹോദരന്‍മാരാണ്.

പിതാവില്‍ നിന്ന് പ്രാഥമിക പഠനം നേടിയ ശേഷം ചെറുമുക്ക്, കൊടുമല, ഇടപ്പള്ളി, തളിപ്പറമ്പ്, പാറക്കടവ് എന്നീ സ്ഥലങ്ങളിലെ ദര്‍സുകളില്‍ നിന്നും ഉന്നത വിജ്ഞാനം കരസ്ഥമാക്കി. പിന്നീട് വെല്ലൂര്‍ ബാഖിയാത്തു സ്സ്വാലിഹാത്തില്‍ ഉപരിപഠനം നടത്തി. ഫിഖ്ഹ്, തഫ്സീര്‍, ഹദീസ്, തസ്വവ്വുഫ്, അഖീദ എന്നിവക്ക് പുറമെ തര്‍ക്കശാസ്ത്രം, ഗോളശാസ്ത്രം, ഉസ്വൂലുല്‍ ഫിഖ്ഹ് തുടങ്ങിയ വിജ്ഞാനത്തിന്റെ വിവിധ ശാഖകളിലും അവഗാഹമാര്‍ജ്ജിച്ച് ബാഖിയാത്തില്‍ നിന്ന് തിരിച്ചു വന്ന ശേഷമാണ് ബിദ്അത്തിനെതിരെ കൊടുങ്കാറ്റായി മഹാനുഭാവന്‍ ആഞ്ഞടിക്കുന്നത്.

സമസ്ത കേരള ജംഇയ്യത്തുല്‍ ഉലമ കേന്ദ്ര മുശാവറ അംഗം, സുന്നിയുവജന സംഘത്തിന്റെ സംസ്ഥാന കമ്മിറ്റി അംഗം (1955 മുതല്‍), വൈസ് പ്രസിഡന്‍റ് (1968 നവംബര്‍ 7 മുതല്‍), സംസ്ഥാന പ്രസിഡന്‍റ് (1976 ആഗസ്റ്റ് 22 മുതല്‍ 1982 ആഗസ്റ്റ് വരെ) എന്നീ നിലകളിലെല്ലാം അര്‍പ്പണ ബോധത്തോടെ പ്രവര്‍ത്തിച്ച് സംഘടനയെ ജീവസ്സുറ്റ പ്രസ്ഥാനമാക്കുന്നതില്‍ പ്രധാന പങ്കുവഹിച്ച ഹസന്‍ മുസ്ലിയാര്‍ സംഘാടനത്തോടൊപ്പം ദര്‍സിനും പ്രത്യേകം പ്രാധാന്യം കൊടുത്തിരുന്നു. ബാഖിയാത്തില്‍ നിന്ന് വന്നയുടനെ അദ്ദേഹം കൊടുവള്ളിക്കടുത്ത ഇയ്യാട്ടാണ് ദര്‍സ് തുടങ്ങിയത്. പിന്നീട് ഉരുളിക്കുന്ന്, പുത്തൂര്‍പാടം, തൃപ്പനച്ചി, ഇരുന്പുചോല, പാലക്കാട്(ജന്നത്തുല്‍ ഉലൂം) കാസര്‍കോട് എന്നിവിടങ്ങളിലും ദര്‍സ് നടത്തുകയുണ്ടായി. തന്റെ തിരക്കുപിടിച്ച ജീവിതത്തിനിടയിലും ദര്‍സ് ഒഴിവാക്കാതിരിക്കാന്‍ അദ്ദേഹം പ്രത്യേകം ശ്രദ്ധിക്കുമായിരുന്നു. അതിനിടയിലാണ് പത്രപ്രവര്‍ത്തനത്തിനും ഗ്രന്ഥ രചനയ്ക്കും കോടതി കയറലിനുമെല്ലാം സമയം കണ്ടെത്തിയിരുന്നത്.

ഭക്ഷണത്തിന് കണിശതയൊന്നുമുണ്ടായിരുന്നില്ല. വിഭവ സമൃദ്ധമായ ഭക്ഷണത്തിനു താല്‍പര്യവുമില്ല. ഉറങ്ങാനും വിശ്രമിക്കാനും സമയം കളഞ്ഞതുമില്ല. യാത്രക്കിടയില്‍ ബസ്സിലും മറ്റുമാണ് ഉറക്കം. അദ്ദേഹവുമായി അടുപ്പമുള്ള ഒരു സുഹൃത്ത്, ഇങ്ങനെ തീരെ വിശ്രമിക്കാതിരുന്നാല്‍ ആരോഗ്യം തകരുമല്ലോ, അല്‍പ്പം വിശ്രമിക്കണം എന്ന് ഉപദേശിച്ചുവത്രെ. ഹസന്‍ മുസ്ലിയാരുടെ പ്രതികരണം ഇങ്ങനെയായിരുന്നു: നാളെ പരലോകത്ത് അല്ലാഹുവിന്റെ മുമ്പില്‍ ചെല്ലുമ്പോള്‍ എന്റെ ഓരോ ശ്വാസവും നിന്റെ ദീനിന്വേണ്ടി ചെലവഴിക്കാന്‍ ഞാന്‍ ശ്രമിച്ചിരുന്നു എന്ന് പറയാന്‍ സാധിച്ചാല്‍ അതല്ലേ ഏറ്റവും നന്നായിരിക്കുക.

തിരക്കിനിടയില്‍ വിട്ടുപോവാതിരിക്കാനായി റവാതിബ് സുന്നത്തുകളും നിസ്കാര ശേഷമുള്ള ദിക്റുകളും അദ്ദേഹം നേര്‍ച്ചയാക്കുകയാണ് ചെയ്യാറ്. സുന്നത്താകുമ്പോള്‍ അത് തല്‍ക്കാലം നിര്‍ത്തിവെക്കാന്‍ തോന്നാതിരിക്കാനാണ് നേര്‍ച്ചയിലൂടെ ഫര്‍ളാക്കിയത്.

തനിക്ക് കിട്ടുന്നതെല്ലാം ദീനി പ്രവര്‍ത്തനത്തിനുവേണ്ടി ചെലവഴിച്ച അദ്ദേഹം സ്വന്തം കുടുംബത്തിനുവേണ്ടി എന്തെങ്കിലും സമ്പാദിക്കാന്‍ ആഗ്രഹിച്ചില്ല. കാസര്‍ക്കോട് ഖാസി ആയിരിക്കുമ്പോള്‍ ഒരു കല്ല്യാണ ആവശ്യത്തിന് തറവാട്ടില്‍ വന്ന സമയത്ത് ജ്യേഷ്ഠന്‍ ഉമര്‍ ഹാജി ചോദിച്ചുവത്രെ: ഹസനേ, കുട്ടികള്‍ക്കു വേണ്ടി സൗകര്യമുള്ള ഒരു വീടെങ്കിലും ഏര്‍പ്പെടുത്താന്‍ നീ ശ്രദ്ധിക്കേണ്ടതല്ലേ?

“എന്തു ചെയ്യാനാണിക്കാ, ഞാന്‍ ജനങ്ങളുടെ ആളായി പോയില്ലേ. എനിക്ക് അതിന് സാധിക്കുന്നില്ല”എന്നായിരുന്നു ഹസന്‍ ഉസ്താദിന്റെ മറുപടി.

താന്‍ സത്യമാണെന്ന് മനസ്സിലാക്കിയത് ആരുടെ മുമ്പിലും തുറന്നുപറയാന്‍ ആര്‍ജ്ജവം കാണിച്ച ഹസന്‍ മുസ്ലിയാര്‍ക്കു മുന്നില്‍ പണത്തിന്റെ പളപളപ്പും പ്രൗഢിയും സ്ഥാനമാനങ്ങളൊന്നും സമ്മര്‍ദ്ദം സൃഷ്ടിച്ചില്ല. തന്റെ ഗുരുനാഥന്മാരോടുപോലും ഇക്കാര്യത്തില്‍ അദ്ദേഹം കൂസലില്ലാതെ പെരുമാറിയിട്ടുണ്ട്. ഇതേ കുറിച്ച് ചോദിച്ചപ്പോള്‍ ഇമാം അശ്അരി(റ)യുടെ മാതൃകയാണ് ഇവിടെ നാം അനുധാവനം ചെയ്യേണ്ടതെന്ന് അദ്ദേഹം പറയാറുണ്ടായിരുന്നു. ചില രാഷ്ട്രീയ പ്രമാണിമാരുടെ ഇംഗിതങ്ങള്‍ക്കു വഴങ്ങി തണുപ്പന്‍ നയം സ്വീകരിച്ചവര്‍ക്കെതിരെ അദ്ദേഹം ആഞ്ഞടിച്ചു. അത് ഏത് വമ്പനായാലും പ്രശ്നമാക്കിയില്ല. ഇക്കാരണത്താല്‍ എതിര്‍പ്പുകളുടെ ഒരു പ്രവാഹം തന്നെ അദ്ദേഹത്തിനുനേരെ പാഞ്ഞടുത്തു. ജോലിപോലും നഷ്ടപ്പെട്ട സന്ദര്‍ഭങ്ങള്‍ ഉണ്ടായിട്ടുണ്ട്.

ഒരു കാലത്ത് പാലക്കാടിന്റെ അഭിമാന കേന്ദ്രമായിരിക്കുകയും പിന്നീട് രാഷ്ട്രീയ ലോബികളുടെ കടന്നാക്രമണത്തിലൂടെ മുരടിച്ചുപോവുകയും ചെയ്ത ജന്നത്തുല്‍ ഉലൂം അറബിക് കോളേജിന്റെ പിറവി ഇതിനൊരുദാഹരണമാണ്. 1965ല്‍ ഹസന്‍ മുസ്ലിയാര്‍ ഇരുന്പുചോലയില്‍ മുദരിസായിരിക്കെ തന്റെ ശിഷ്യഗണങ്ങളോട് നാട്ടുകാരായ ചില പ്രമാണിമാര്‍ അപമര്യാദയായി പെരുമാറിയത് ഇഷ്ടപ്പെടാതെ വന്നപ്പോള്‍ അന്നുരാത്രി തന്നെ ശിഷ്യരേയും കൂട്ടി ഇരുന്പുചോലയോട് യാത്ര പറഞ്ഞു. ഈ ഇറങ്ങിപ്പോക്കാണ് ജന്നത്തുല്‍ ഉലൂമിന് ജന്മം നല്‍കാന്‍ സഹായകമായത്. പാലക്കാടിനൊരു സുന്നി ആസ്ഥാനമെന്ന ഹസന്‍ മുസ്ലിയാരുടെ ചിരകാലാഭിലാഷത്തെ രാഷ്ട്രീയ തിമിരം ബാധിച്ചവര്‍ ഊതിക്കെടുത്താന്‍ ശ്രമിച്ചെങ്കിലും കാലം അതിനു സമ്മതിച്ചില്ല. ഹസന്‍ മുസ്ലിയാര്‍ കൊളുത്തിവെച്ച അഗ്നിസ്ഫുലിംഗം പാലക്കാടിന്റെ ആദര്‍ശ കേന്ദ്രമായി പരിലസിക്കുന്ന ജാമിഅ ഹസനിയ്യ എന്ന മഹത്തായ സ്ഥാപന സമുച്ചയങ്ങളിലൂടെ പ്രകാശം പൊഴിക്കുകയാണ്. അതിന്റെ ഇരുപതാം വാര്‍ഷികം 2015 ഫെബ്രുവരിയില്‍ നടക്കാനിരിക്കുമ്പോള്‍ ഇതു കാണാന്‍ ഹസന്‍ മുസ്ലിയാര്‍ ഇല്ലല്ലോ എന്ന വേദനയാണ് സുന്നി കൈരളി പങ്കുവെക്കുന്നത്. നാഥന്‍, ആ മഹാനുഭാവന്റെ പരലോക ജീവിതം സുഖദായകമാക്കട്ടെ.

ബഷീര്‍ സഖാഫി വണ്ടിത്താവളം