ദീർഘ യാത്രയിലാണല്ലോ ജംഉം ഖസ്റും അനുവദനീയമാവുക, ദീർഘ യാത്രയായി പരിഗണിക്കാൻ എത്ര ദൂരം വേണം

 ചോദ്യം: ദീർഘ യാത്രയിലാണല്ലോ ജംഉം ഖസ്റും അനുവദനീയമാവുക, ദീർഘ യാത്രയായി പരിഗണിക്കാൻ എത്ര ദൂരം വേണം ?

ഉത്തരം: 48 ഹാശിമീ മൈലാണ് ദീർഘ യാത്രയായി

പരിഗണിക്കാനാവശ്യമായ ദൂരമെന്ന് ശാഫിഈ കർമ്മ ശാസ്ത്ര പണ്ഡിതന്മാർ വ്യക്തമാക്കിയിട്ടുണ്ട്. അബ്ദുല്ലാ ഹിബ്നു ഉമർ (റ), അബ്ദുല്ലാഹിബ്‌നു അബ്ബാസ് (റ) തുടങ്ങിയ സ്വഹാബി പ്രമുഖർ നാലു "ബരീദ്" ദൈർഘ്യമുള്ള യാത്രയിൽ ഖസ്‌റ് നിർവ്വഹിച്ചിരുന്നതായി സ്വഹീഹായ ഹദീസുണ്ട്. മറ്റു സ്വഹാബികളാരും ഇതിൽ വിയോജിച്ചിട്ടില്ല. ഒരു ബരീദ് നാല് ഫർസഖും ഒരു ഫർസഖ് മൂന്ന് ഹാശിമീ മൈലുമാണ്. അപ്പോൾ നാലു ബരീദ് നാൽപത്തിയെട്ട് ഹാശിമീ മൈലുകളാണ്. ഇതാണ് ദീർഘ യാത്രയുടെ ദൂരം. ഹാശിമിയ്യായ നാൽപത്തിയെട്ട് മൈലുകളാണ് രണ്ട് മർഹല എന്ന് പറയുന്നതിന്റെ വിവക്ഷ.

ഒരു ഹാശിമി മൈൽ ആറായിരം മുഴമാണെന്ന് കർമ്മ ശാസ്ത്ര ഇമാമുകൾ വ്യക്തമാക്കിയിരിക്കുന്നു. ഒരു മുഴം ഏകദേശം 46.1 സെൻ്റീ മീറ്ററാണ്. ഇതനുസരിച്ച് ഒരു ഹാശിമീ മൈൽ 2766 മീറ്ററാണ്. അഥവാ രണ്ട് കിലോമീറ്ററും 766 മീറ്ററും. അപ്പോൾ 48 ഹാശിമീ മൈൽ 132.768 കിലോമീറ്ററായിരിക്കും. മടക്ക യാത്രയും കൂടി പരിഗണിച്ച് മേൽ പറഞ്ഞ ദൂരം ഉണ്ടായാൽ മതിയാകുന്നതല്ല. ലക്ഷ്യ സ്ഥാനത്തേക്കുള്ള ദൂരം മാത്രം മേൽ പറഞ്ഞ കിലോമീറ്ററുകളുണ്ടായിരിക്കണം.

ഫതാവ നമ്പർ (596)

ഉസ്താദ് അബ്ദുൽ ജലീൽ സഖാഫി ചെറുശോല

https://chat.whatsapp.com/JHCZtDEtEfc2tJeuVPxyvn