മേൽ വാടക

 ചോദ്യം: ഷെഡ്ഡ് കെട്ടി കച്ചവടം നടത്താനായി ഞാനൊരു ഭൂമി വാടകക്ക് എടുത്തു. ഞാൻ വാടകക്കെടുത്ത ഭൂമി

പൂർണ്ണമായും എനിക്ക് അവശ്യമില്ലെന്ന് വന്നാൽ എന്റെ ആവശ്യം കഴിഞ്ഞു ബാക്കിയുള്ള ഭൂമി ഇതേ ആവശ്യത്തിന് ഞാൻ മറ്റൊരാൾക്ക് വാടകക്ക് കൊടുത്തു വാടക വാങ്ങൽ അനുവദനീയമാണോ? അനുവദനീയമാണെങ്കിൽ രണ്ടു വാടകയും തുല്യമാവണമെന്നുണ്ടോ ?

ഉത്തരം: അതേ; നിങ്ങൾ വാടക ഇടപാടിലൂടെ കൈവശം വാങ്ങിയ ഭൂമി പൂർണ്ണമായോ ഭാഗികമായോ നിങ്ങൾ മറ്റൊരാൾക്ക് വാടകയ്ക്ക് നൽകൽ അനുവദനീയമാണ്. നിങ്ങൾ വാടകക്കെടുത്ത ഭൂമിയുടെ ഉപകാരം നിങ്ങൾക്ക് അവകാശപ്പെട്ടതാകുന്നു. ഉപകാരമെടുക്കാൻ വേണ്ടി ഭൂമി നിങ്ങൾ മറ്റൊരാൾക്ക് വാടകക്ക് നൽകുന്നതിന് തടസ്സമില്ല. വാടക ഇടപാട് നടത്താൻ വസ്‌തുവിൻ്റെ ഉടമാവകാശം നിർബന്ധമില്ല. വസ്‌തുവിൻ്റെ ഉപകാരം ഉടമയാക്കിയാൽ മതിയാകുന്നതാണ്.

ഭൂമിയുടെ ഉടമസ്ഥനിൽ നിന്ന് നിങ്ങൾ വാടകക്കെടുത്ത ഭൂമിയുടെ ഉപകാരം (ഷെഡ്ഡ് നിർമ്മിച്ചു കച്ചവടം നടത്തൽ) നിങ്ങൾക്ക് അവകാശപ്പെട്ടതിനാൽ പ്രസ്തുത ഭൂമി കൈവശം വാങ്ങിയതിനു ശേഷം നിങ്ങൾ മറ്റൊരാൾക്ക് വാടകക്ക് കൊടുക്കാവുന്നതാണ്. തുഹ്ഫ 4-402, നിഹായ 4-86 തുടങ്ങിയവയിൽ നിന്ന് ഇക്കാര്യം വ്യക്തമാണ്. അങ്ങനെ വാടകയ്ക്ക് നൽകുമ്പോൾ രണ്ടു വാടകയും തുല്യമായിരിക്കണമെന്നില്ല. ഒന്നാം ഇടപാടിൽ നിശ്ചയിച്ച വാടകയേക്കാൾ രണ്ടാം ഇടപാടിലെ വാടക കൂടുകയോ കുറയുകയോ ചെയ്യുന്നതിന് വിരോധമില്ല.

ഫതാവാ നമ്പർ : 930  

ഉസ്താദ് അബ്ദുൽ ജലീൽ സഖാഫി ചെറുശ്ശോല

https://chat.whatsapp.com/JHCZtDEtEfc2tJeuVPxyvn